މިއަހަރު ބާއްވާ ރިޔާސީ އިންތިޚާބުގައި އަމިއްލަގޮތުން ވާދަކުރައްވާނެ ކަމުގައި، ފާރިޝް މައުމޫން އިޢުލާނުކުރައްވައިފިއެވެ.

ފާރިޝް މައުމޫނު އަމިއްލަ ގޮތުން އިންތިޚާބުގައި ވާދަކުރާނެކަން ޢިއުލާނުކުރެއްވީ، މިއަދު ހަވީރު އާއްމު ކުރެއްވި ވީޑިއޯ މެސެޖެއްގައެވެ. ފާރިޝް ވިދާޅުވީ، ރިޔާސީ އިންތިޚާބަށް ނުކުންނެވީ، ދިވެހި ރައްޔިތުން އެދިވަޑައިގަންނަވާ ގޮތެއްގެ މަތިން ދިވެހިރާއްޖޭގެ ކަންކަން އިސްލާޙް ކުރެއްވުމުގެ މާތް މަޤުޞަދުގައި ކަމަށެވެ.

ފާރިޝް މައުމޫނު ރިޔާސީ އިންތިޚާބަށް ނުކުންނަވާކަން އިޢުލާނު ކުރެއްވި އިރު، މިއަދު ސްޕްރީމްކޯޓުން ވަނީ، ޕީޕިއެމްގެ ރިޔާސީ ކެންޑިޑޭޓް ޢަބުދުﷲ ޔާމީން ޢަބުދުލްޤައްޔޫމްގެ ޝަރުޠު ހަމަނުވާ ކަމަށާއި، އިލެކްޝަންސް ކޮމިޝަނުން ރައީސް ޔާމީންގެ ކެންޑިޑެންސީ ބަލައިނުގަތީ ރަނގަޅަށް ކަމަށް ކަނޑައަޅާފައެވެ.

ޕީޕީއެމްއަކީ ރާއްޖޭގެ އެންމެ ބޮޑު ސިޔާސީ ޕާޓީއަށް ހެއްދެވުމުގައި ރައީސް މައުމޫނާއި ފާރިޝް މައުމޫނު މުހިއްމު ދައުރެއް އަދާކުރެއްވިއިރު، ނާޖާއިޒް ނުފޫޒާއ ބާރުގެ ބޭނުން ކުރައްވައިގެން ރައީސް ޔާމީނު ޕީޕީއެމްގެ ކޮންޓްރޯލް ނަންގަވައި، ޕީޕީއެމްއިން އެބޭފުޅުން ބޭރުކޮށްލެއްވުމުން، މައުމޫން ރިފޯމް މޫވްމެންޓްގެ ނަމުގައި، 2018ގެ ރިޔާސީ އިންތިޚާބާއި ދިމާކޮށް ހަރަކާތެއް ހިންގެވިއެވެ. އަދި ފަހުން މޯލްޑިވުސް ރިފޯމް މޫވްމެންޓްގެ ނަމުގައި، ސިިޔާސީޕާޓީއެއް އުފައްދަވައި އެޕާޓީގެ ރައީސެއްގެ ގޮތުން އެޕާޓީ ހިންގަވަމުން ގެންދެވީވެސް ފާރިޝް މައުމޫނެވެ. އެހެން ނަމަވެސް އެޕާޓީގައި 3000 މެމްބަރުން ހަމަނުވާތީ، އެޕާޓީ އުވާލަން ނިންމައި އެޕާޓީގެ ނަމުގައި އެއްވެސް ސިޔާސީ ޙަރަކާތެއް ހިންގުން އިލެކްޝަންސް ކޮމިޝަނުން ވަނީ މަނާކޮށްފައެވެ.

ރިޔާސީ އިންތިޚާބުގައި ފާރިޝް މައުމޫނު ވާދަކުރައްވާއިރު، 2019 ވަނަ އަހަރުގެ ރައްޔިތުންގެ މަޖިލީހުގެ އިންތިޚާބުގައި، މައްޗަންގޮޅި އުތުރު ދާއިރާއަށް ވާދަކުރައްވައި ފާރިޝްމައުމޫނަށް ކުރިމަތިވެވަޑައިގަތީ ނާކާމިޔާބާއެވެ. އެހެން ނަމަވެސް 18 ވަނަ ރައްޔިތުންގެ މަޖިލީހުގެ ދިއްގަރު ދާއިރާގެ ބައި އިލެކްޝަން ކާމިޔާބު ކުރައްވައިގެން 18 ވަނަ ރައްޔިތުންގެ މަޖިލީހުގެ ދައުރުގެ ބާކީ އޮތް މުއްދަތުގައި ފާރިޝް މަޖިލީހުގެ މެމްބަރުކަން ކުރައްވިއެވެ.

ޕީޕީއެމްގައި އަދިވެސް ރައީސް މައުމޫނުގެ ސަޕޯޓަރުންނާއި، އެމަނިކުފާނަށް ތާއީދު ކުރާ ފަރާތްތައް ތިބި އިރު، ރިޔާސީ އިންތިޚާބަށް ފާރިޝް މައުމޫނުގެ އިތުރުން، ޕީއެންސީގެ ކެންޑިޑޭޓް ޑރ މުޢިއްޒާއި އަދި، ޕީޕީއެމްއިން ނެރޭ ކެންޑިޑޭޓަކު ވާދަކޮށްފިނަމަ ޕީޕީއެމްގެ މެމްބަރުންގެ ވޯޓުތައް ބެހިގެންދާނެއެވެ.