އައްޑޫ ހަންކެޑެ ކޯޒުވޭގައި މަރުވެފައި ވަނިކޮށް މިއަދު ފެނުނު ޒުވާނާގެ މަރާއި ގުޅިގެން ސުވާލުތަކެއް އުފައްދައިފިއެވެ.

އައްޑޫ ސިޓީ ހަންކެނޑެ ބުރިޖުގައި ވާގަނޑެއް އައްސައި ދަންޖެހި މަރުވެފައި ހުރި ޒުވާނަކު މިއަދު ވަނީ ފެނިފައެވެ. އެއީ އުމުރުން 19 އަހަރުގެ ޒުވާނެކެވެ. އޭނާގެ މަރާއި ގުޅިގެން އެއީ ބަޔަކު ރާވައިގެން މަރާލާފައިވާ ޒުވާނެއް ކަމަށާއި އެއީ އަމިއްލަ މަރެއް ނޫންކަމަށް ބުނެ ސޯޝަލް މީޑިއާގައި ވަނީ ސުވާލުތައް އުފައްދައި ކަންބޮޑުވުން ފާޅުކޮށްފައެވެ.

އަދި މަރުގެ އެމައްސަލައިގައި އައްޑޫގެ ދާއިރާއެއް ތަމްސީލު ކުރާ މަޖިލިސް މެމްބަރަކާއި ގުޅުން އޮންނަ ފަރާތްތަކަށްވެސް ތުހުމަތުތަކެއްކޮށްފައިވެއެވެ. އަދި މަރުވި ޒުވާނާއަކީ، މީގެ ކުރިން ހިނގާފައިވާ މާރާމާރީއަކާގުޅޭ މައްސަލައެއްގެ ސިއްރު ހެކިވެރިއެއް ކަމަށާއި އެހެން ނަމަވެސް އެޒުވާނާގެ ނަން ތުހުމަތުކުރެވޭ ގުރޫޕްގެ މީހުންނަށް އެނގުނީ ޤާޟީގެ އިހުމާލުންކަމަށް ވެސް ތުހުމަތުކޮށްފައިވެއެވެ.

އެހެންނަމަވެސް ފުލުހުންގެ އިދާރާއިން ވިދާޅުވީ، މަރުގެ އެމައްސަަލައިގައި ކުރާ އެ ތުހުމަތުތަކަކީ ދޮގެއް ކަމަށެވެ. ނަމަވެސް މަރުގެ އެމައްސަައަކީ، އަމިއްލަ މަރެއްތޯ، ނުވަތަ ބަޔަކު އެ ޒުވާނާ މަރާލީ ކަމަށް ބެލެވޭނެ އެއްވެސް ނިޝާނެއް ފެންނަން ހުރިތޯ ކުރި ސުވާލަށް ފުލުހުން ޖަވާބެއް ނުދެއްވައެވެ.  

ފުލުހުންގެ އިދާރާއިން ވިދާޅުވީ، ނިޔާވެފައިވާ އެ ޒުވާނާ އަކީ، އެއްވެސް މައްސަލައެއްގެ ހެކިވެރިއެއްގެ ގޮތުގައި ގެނެސްފައިވާ މީހެއް ނޫންކަމަށާއި، އަދި ތުހުމަތު ކުރެވޭ މައްސަލައެއްވެސް އޮތް މީހެއް ނޫންކަމަށެވެ.

މީގެ އިތުރުން ނިޔާވި ޒުވާނާ އާއި ގުޅޭ ގޮތުން، އެއްވެސް ޙަޤީޤަތެއް ނެތް ދޮގު މައުލޫމާތު ފެތުރުން ހަރުކަށި އިބާރާތުން ކުއްވެރިކުރާ ކަމުގައިވެސް ފުލުހުންގެ އިދާރާއިން ވިދާޅުވިއެވެ.

ފުލުހުންގެ އިދާރާއިން ވިދާޅުވީ، މަރުގެ އެމައްސަލަ ފުލުހުން ތަޙްޤީޤު ކުރަމުންގެންދާ ކަމަށެވެ.