އާބަން ސެންޓަރުތަކުގެ ގޮތުގައި މިސަރުކާރުން 7 ރަށެއް ކަނޑައަޅައި އިޢުލާނު ކުރުމާއި އެކު އެކަމަށް ކުރީގެ ފިނޭންސް މިނިސްޓަރ އިބްރާހީމް އަމީރު ފާޑު ވިދާޅުވެއްޖެއެވެ.

ކުރީގެ ފިނޭންސް މިނިސްޓަރ އިބްރާހީމް އަމީރު ކުރެއްވި ޓްވީޓްގައި ވިދާޅުވީ، ދައުލަތުގެ ފައިސާ ޚަރަދުކޮށްގެން ޤައުމީ ތަރައްޤީގެ ބޮޑެތި ޕްލޭންތަކެއް ހެދުމުގެ ބަދަލުގައި، ޕާޓީ ހައިރާކީއާ އެއްގޮތަށް ބަހާލީމަ ނިމުނީ ކަމަށެވެ. އަމީރު މިކަމަށް ފާޑު ވިދާޅުވީ، އާބަން ސެންޓަރުގެ ގޮތުގައި ރަށްތައް ކަނޑައެޅުމުގައި އަމަލުކޮށްފައިވާ ގޮތުންނެވެ. އެގޮތުން އެލިސްޓުގައި ހިމަނާފައިވާ ރަށްތަކުގެ ތެރޭގައި ހިމެނެނީ، ކުރީގެ ސަރުކާރުތަކުގައި ތަރައްޤީކުރުމަށް ނިންމާފައިވާ ރަށްތަކާއި ޚިލާފަށް، މިސަރުކާރުގެ ވެރިންނާއި ރައީސުލްޖުމްހޫރިއްޔާގެ އާއިލީ ބޭފުޅުންނާއިގުޅުން ހުރި ރަށްތަކެވެ. މިގޮތުން ރައީސުލްޖުމްހޫރިއްޔާގެ ކޮއްކޯފުޅު ސައުދާ ނިސްބަތްވެވަޑައިގަންނަވާ، ފ. ނިލަންދޫ އާއި، ރައްޔިތުންގެ މަޖިލީހުގެ ރައީސް ޢަބުދުއްރަހީމް ނިސްބަތްވެވަޑައިގަންނަވާ، ލ. ފޮނަދޫ ވަނީ އާބަންސެންޓަރުގެ ގޮތުގައި ތަރައްޤީކުރުމަށް ކަނޑައަޅާފައިވާ ލިސްޓުގައި ހިމަނާފައެވެ. 

ކުރީގެ ފިނޭންސް މިނިސްޓަރ އަމީރު ވިދާޅުވީ، އެ ލިސްޓުގައި ހިމެނޭ ރަށްތައްވެސް ތަރައްޤީކުރަން ޖެހޭނެ ކަމަށެވެ. އެހެން ނަމަވެސް، މި ރާއްޖޭގައި ޒަމާނުއްސުރެ އާބަން ސެންޓަރުތަކުގެ ގޮތުގައި ބަލަމުން އައި، ވިޔަފާރި މަރުކަޒުތަކަށް ދެން ވަނީ ކިހިނެއްތޯ އަމީރު ސުވާލު އުފެއްދެވިއެވެ. އެގޮތުން، ހދ. ކުޅުދުއްފުށި، ގދ. ތިނަދޫ، ލ.ގަން، އައްޑޫ، ފުވައްމުލައް އެލިސްޓުގައި ހިމަނާފައި ނެތުމަކީ ހަޤީޤީ މާނައިގައި މި ޤައުމު ތަރައްޤީކުރުމުގެ 'ވިޜަން' މި ސަރުކާރުގެ ނެތްކަން ވަރަށް ސާފުކޮށް އެނގޭ ކަމެއް ކަމުގައި އަމީރު ވިދާޅުވިއެވެ.

މިސަރުކާރުން އާބަން ސެންޓަރުގެގޮތުގައި ތަރައްޤީކުރުމަށް ކަނޑައަޅައި އިޢުލާނުކުރި ރަށްރަށަކީ؛

1- ރ. އުނގޫފާރު

2- ބ. އޭދަފުށި

3- ޅ. ނައިފަރު

4- އދ. މަހިބަދޫ

5- ފ. ނިލަންދޫ

6- ދ. ކުޑަހުވަދޫ

7- ލ. ފޮނަދޫ

މިރަށްތައް ކަނޑައަޅާފައިވާ ގޮތާއި ގުޅިގެން ސިޔާސީ ފަރާތްތަކުންނާއި އާއްމު ފަރާތްތަކުންވެސް އަންނަނީ ސޯޝަލް މީޑިއާގައި ސަރުކާރަށް ފާޑު ކިޔަމުންނެވެ.