ގޭންގުތަކާއި ދެކޮޅަށް އެޅެން ހުރި އެންމެ ހަރުކަށި ފިޔަވަޅުތައް އަޅުއްވާނެ ކަމުގައި ހޯމް މިނިސްޓަރ ޢަލީ އިޙްސާން ވިދާޅުވެއްޖެއެވެ.

މިނިސްޓަރ އިޙްސާން މިހެން ވިދާޅުވީ، ހުޅުމާލެ ފޭސް 2 ގެ ހިޔާޓަވަރެއްގައި މީހަކު ރަހީނުކޮށްގެން ގެންގުޅޭކަމަށް ލިބުނު އިންޓެލިޖެންސް ރިޕޯޓަކާއި ގުޅިގެން އެމީހާ ސަލާމަތް ކުރުމަށް ފުލުހުން ހިންގި އޮޕަރޭޝަނަށް ފަހުގައި، ރާއްޖޭގެ މީޑިއާތަކަށް ދެއްި ބަސްދީ ގަތުމުގައެވެ. 

މިނިސްޓަރ އިހްސާން ވިދާޅުވީ، ކުށުގެ މިފަދަ ޢަމަލުތައް ހިންގަމުން އަންނަނީ ތަންތަން ކުއްޔަށް ނަގައިގެން ކަމަށާއި، އެގޮތުން ބައެއް ތަންތަނަކީ އެފަދަ އަމަލުތައް ތަކުރާރުކޮށް ހިންގަމުން އަންނަ ތަންތަން، ކަމަށް ވުމާއިއެކު އެކަމާއި ގުޅިގެންވެސް އަޅުއްވަންޖެހޭ ފިޔަވަޅުތައް އަޅުއްވާނެ ކަމަށެވެ. މިގޮތުން އެފަދަ ތަންތަނުގެ ވެރިންނާއި މެދުވެސް ފިޔަވަޅު އަޅުއްވައި އެފަދަ ތަންތަން އަނބުރާ ދައުލަތަށް ނެގޭނެ ގޮތެއް އޮތްނަމަ އެކަންވެސް ކުރައްވާނެ ކަމުގައި މިނިސްޓަރ އިހްސާން ވިދާޅުވިއެވެ.

ރޭ ހިޔާގެ 9 ވަނަ ޓަވަރުގެ 20 ވަނަ ފަންގިފިލާގެ 11 ވަނަ އެޕާޓްމަންޓްގައި މީހަކު ރަހީނުކޮށްގެން އުޅެނިކޮށް ފުުލުހުން ސަލާމަތް ކުރި އިރު، އެ އެޕާޓްމަންޓަކީ، މީގެ ކުރިންވެސް މަސްތުވާތަކެތީގެ މައްސަލަތަކުގައި ދޭތެރެ ދޭތެރެއިން ފުލުހުން ރެއިޑް ޖަހަމުން އަންނަ އެޕާޓްމަންޓެކެވެ. ހޯމްމިނިސްޓަރ ޢަލީ އިޙްސާނު ވިދާޅުވީ، ހިޔާގެ ބައެއް އެޕާޓްމަންޓްތައް ކުއްޔަށް ނަގައިގެން ބައެއް ފަރާތްތަކުން ކުށުގެ އަމަލުތައް ހިންގަމުން އަންނަކަން ފާހަގަކުރެވިފައިވާ ކަމަށެވެ.