ބޭންކް އޮފް މޯލްޑިވްސް އުފެދުނީއްސުރެ އެބޭންކުގައި ވަޒީފާއަދާކުރެއްވީ އައިޝަތު ނޫރައްދީން 42 އަހަރުގެ ޚިދުމަތަށް ފަހުގައި، މަޤާމުން ވަކިވެވަޑައިގެންފިއެވެ.

އޭނާ މަޤާމުން ވަކިވެވަޑައިގެންނެވި އިރު ހުންނެވީ، ބޭންކް އޮފް މޯލްޑިވްސްގެ ޑެޕިއުޓީ ސީއީއޯގެ މަޤާމުގައެވެ. ބޭންކު ހިންގެވުމުގައި އަމަލީ ގޮތުން އައިޝަތު ވަނީ ދިގު މުއްދަތެއް ހޭދަކުރައްވާފައެވެ. ބޭންކުގެ ބޯޑުގައިވެސް އޭނާ މަސައްކަތް ކުރެއްވި އިރު އޮގަސްޓްމަހު އޭނާ ބޯޑުން އިސްތިއުފާ ދެއްވީ، ބޭންކުން ކާޑުތަކަށް ޑޮލަރު ލިމިޓް ކުރުމަށް އިއުލާނުކުރި އުސޫލާއި ގުޅިގެން، ބަޣާވާތެއްގެ ތުހުމަތުތައް ސަރުކާރުން ބޭންކަށް ތުހުމަތުކޮށްފައި އޮތް ދަނޑިވަޅެއްގައެވެ.

އައިޝަތު ނޫރައްދީނަށް ޢަލްވަދާއު ކިޔުމަށް ބޭންކް އޮފް މޯލްޑިވްސްއިން މިއަދު ވަނި ޚާއްޞަ ރަސްމިއްޔާތެއްވެސް ބާއްވާފައެވެ. ބޭންކުން އައިޝަތު ނުކުމެވަޑައިގަތީ ރަތްދޫލަ މަތީގައެވެ. 

މީގެ އިތުރުން ބޭންކުން ވަނީ އައިޝަތު ނޫރައްދީންގެ ޚިދުމަތުގެ އަގުވަޒަންކޮށް، ބޭންކުގެ ކާމިޔާބީތަކުގައި އޭނާގެ ބައިވެރިވުމަށް ތަޢުރީފްކޮށްފައެވެ.