ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގެންދަވަނީ، ދިވެހިރައްޔިތުންނަށް ވެވަޑައިގެންނެވި ކޮންމެ ވަޢުދަކާއިވެސް ޚިލާފުވެވަޑައިގަންނަވަމުން ކަމުގައި، އެމްޑީޕީގެ ޗެއާ ޕަރސަން ފައްޔާޒް އިސްމާޢީލް ވިދާޅުވެއްޖެއެވެ.

އެމްޑީޕީން ރޭ ބޭއްވި ހަރުގެ ޖަލްސާގައި ވާހަކަފުޅު ދައްކަވަމުން ފައްޔާޒު ވިދާޅުވީ، މިފެންނަމުންދަނީ، ރައީސުލްޖުމްހޫެރިއްޔާ ވެވަޑައިގެންފައި އޮތް ކޮންމެ ވަޢުދަކާއިވެސް ޚިލާފަށް ޢަމަލުކުރައްވަމުން ގެންދަވާ މަންޒަރު ކަމަށެވެ. އަދި ކޮންމެ ކަމަކަށްވެސް މިސަރުކާރުން ދައްކަމުން އަންނަނީ، ކުރީ ސަރުކާރުގެ ބަހަނާ ކަމުގައި ފައްޔާޒު ވިދާޅުވިއެވެ.

ފައްޔާޒު ވިދާޅުވީ އެމްޑީޕީގެ ސަރުކާރުގައި ރައީސުލްޖުމްހޫރިއްޔާގެ އޮފީހުގައި ތިއްބެވި ހުރިހާ މުވައްޒަފުންނާއި އެކުގައިވެސް ޖުމުލަ ތިބީ 1000 ސިޔާސީ މުވައްޒަފުން ކަމަށެވެ. އެހެން ނަމަވެސް މިހާރު މިސަރުކާރުގައި ތިބި ސިޔާސީ މުވައްޒަފުންގެ އަދަދު 2300އަށް އަރާކަމުގައި ފައްޔާޒް ވިދާޅުވިއެވެ.