ގެދޮރުވެރިޔާ ސްކީމްގެ ދަށުން ހުޅުމާލެ ދެވަނަ ފިޔަވަހީގައި, އަޅާފައިވާ 4000 ފްލެޓް ލިބޭ މީހުންގެ ލިސްޓް އިއުލާނު ކުރާނީ ނޮވެމްބަރު މަހުގައި ކަމުގައި ހައުސިންގ މިނިސްޓްރީން ވިދާޅުވެއްޖެއެވެ.

ހައުސިންގ މިނިސްޓަރ ޑރ. ޢަލީ ހައިދަރު ކުރިން ވިދާޅުވީ މިދިޔަ ހަފްތާގައި ފްލެޓް ލިބޭ މީހުންގެ ލިސްޓް އާއްމު ކުރައްވާނެ ކަމަށެވެ. އެހެން ނަމަވެސް ބައެއް މައްސަލަތައް ދިމާވެގެން ފްލެޓް ލިބޭ މީހުންގެ ފައިނަލް ލިސްޓް އާއްމު ކުރުން ނޮވެމްބަރު މަހަށް ފަސްކޮށްފައިވާ ކަމުގައި އެމިނިސްޓްރީން ވަނީ ވިދާޅުވެފައެވެ. އެހެން ނަމަވެސް ލިސްޓް އާއްމު ކުރުން ފަސްކުރި ސީދާ ސަބަބެއް އެމިނިސްޓްރީން ހާމަކޮށްފައެއް ނުވެއެވެ. އެހެން ނަމަވެސް މިދިޔަ ސަރުކާރުން އާންމުކުރި ފްލެޓް ލިބޭ މީހުންގެ ލިސްޓާއި ގުޅިގެން ހުށައެޅުނު މައްސަލަތައް އަދިވެސް ބަލައި ނުނިމޭ ކަމުގައި ހައުސިންގ މިނިސްޓްރީން ވަނީ ބުނެފައެވެ.

ގެދޮރުވެރިޔާ ސްކީމްގެ ދަށުން ހުޅުމާލެ ފޭސް 2 އިން، 13000 މީހުންނަށް ފްލެޓް ދިނުމަށް ސަރުކާރުން އޮތީ ނިންމާފައެވެ. އަދި އެންމެ ފުރަތަމަ ނިމޭ 4000 ފްލެޓް ލިބޭނެ ފަރާތްތައްވެސް އެމްޑީޕީގެ ސަރުކާރު ނިމުނުއިރު އޮތީ ކަނޑައަޅާފައެވެ. އެހެން ނަމަވެސް އެ ފްލެޓްތައް ދިނުމުގައި މައްސަލަތައް ހުރިކަމަށް ބުނެ ލިބުނު ޝަކުވާތަކާއި ގުޅިގެން، އަލުން އެލިސްޓް ޗެކްކޮށް އިއުލާނު ކުރާނެ ކަމުގައި ހައުސިންގ މިނިސްޓްރީން ވަނީ ވިދާޅުވެފައެވެ.