ރާއްޖޭގެ  ރުއްތަކަށް ބަލިތަކެއް ޖެހުމުގެ ސަބަބުން ކާއްޓާއި ކުރުނބާ ލިބުން ވަރަށް ބޮޑަށް ދަތިވެގެންދިޔައެވެ. މިއާއިއެކު ރާއްޖެއިން ބޭރުން ކާށި އަދި ކުރުނބާ އެތެރެވެސް ކުރަން ޖެހުނެވެ. ނަމަވެސް ރާއްޖެއަކީ ޒަމާނުއްސުރެ ކާއްޓާއި ކުރުނބާ އެތެރެނުކޮށް އަމިއްލައަށް ހައްދައިގެން، ކަމުން އައި ބައެކެވެ.

މި މައްސަލަ ހައްލުކުރެއްވުމަށްޓަކައި މި ސަރުކާރުން ރުއް އާލާކުރުމުގެ ޤައުމީ ޕްރޮގްރާމެއް ފެއްޓެވިއެވެ. ފުރަތަމަ ބުރު ފަށައިގެން މިހާރު ކުރިއަށްދާއިރު މި ބުރުގައި 4،980 ރުއް ވަނީ ރާއްޖެ ގެނެސްފައެވެ. އަދި މި ރުއްތަކުގެ ތެރެއިން 3،955 ރުއް މިހާރު ވަނީ 26 ރަށެއްގައި އިންދާފައެވެ. މި ޕްރޮގްރާމް ކުރިއަށްގެންދަނީ މިނިސްޓްރީ އޮފް ފިޝަރީޒް މެރިން ރިސޯސަސް އެންޑް އެގްރިކަލްޗަރ އިން ގްރީން ފަންޑުގެ މާލީ އެހީތެރިކަމާއެކުއެވެ.

މިނިސްޓްރީން ވިދާޅުވީ، މިހާރު ރުއް އިންދާފައިވަނީ އެކަމަށް އެދުނު ރައްތަކުގެ ތެރެއިން ބިން އޮތް ރަށްރަށުގައި ކަމަށެވެ. މީގެ އިތުރުން ރާއްޖެ ގެނައި ރުއްތަކުގެ ތެރެއިން 785 ރުއް އަދި އިންދަން އެބަހުރިކަމަށެވެ. އެހެންކަމުން ރުއް އިންދަން އެދޭ ރަށްރަށުގައި ޖާގަ އޮތް މިންވަރަކަށް ބަލައި އެ ފުރުޞަތު ދޭނެކަމަށެވެ. މިހާރު ހުރި ރުއްތައް އިންދާ ނިމުމުން އިތުރު ރުއް އިންދުމަށް ގެނައުމަށް ހަމަޖެހިފައިވާކަމަށް މިނިސްޓްރީން މައުލޫމާތުދެއެވެ. އެގްރިކަލްޗަރ މިނިސްޓްރީން ލަފާކުރަނީ މިހާރު އިންދާފައިވާ ރުއްތަކުން 2 ނުވަތަ 3 އަހަރުތެރޭ ކުނރުބާ ލިބި، ނަފާ ހޯދަން ފެށޭނެކަމަށެވެ. އެ މިނިސްޓްރީގެ އަމާޒަކީ ރާއްޖޭގެ ހުރިހާ އަތޮޅުތަކެއްގައި ވެސް ރުއްދަނޑުތައް ހެއްދުމެވެ.