މަރައިލާނެކަމަށް ބުނެ މުސްކުޅި މަންމައަށް ވަޅިން ބިރުދައްކައި، މަންމަގެ އަތުން ފޭރުނު މީހަކު ފުލުހުން ހައްޔަރުކޮށްފިއެވެ.

ފުލުހުންގެ އިދާރާއިން މީޑިއާތަކަށް ފޮނުވި މެސެޖުގައި ވިދާޅުވީ، އުމުރުން 57 އަހަރުގެ މަންމައަށް ބިރުދައްކައި، މާރާމާރީ ހިންގައި މަންމަގެ އަތުން ފޭރިގެންފައި ވަނީ މަންމަގެ ފޯނު ކަމަށެވެ. 

ފުލުހުންގެ އިދާރާއިން ވިދާޅުވީ، ފުލުހުންނަށް އެހާދިސާ ކިޔައިދިނީ އަންހެން މީހާކަމަށާއި، ހުޅުމާލެ ފޭސް 2ގެ ހިޔާގެ 13 ވަނަ ޓަވަރުގައި އެ އަންހެންމީހާ ދިރިއުޅެމުން ދިޔަ އެޕާޓްމަންޓަށް ފުލުހުން ދިޔައީ އެ އެޕާޓްމަންޓުން އަންހެނަކު ރޯއަޑު އިވިގެން ރިޕޯޓް ކުރުމުން ކަމަށެވެ.

ފުލުހުން ވިދާޅުވީ، ރޭ އިރުއޮއްސި 18:17 ހާއިރު ފުލުހުން އެ އެޕާޓްމަންޓަށް ވަނުމަށްފަހުން އަންހެންމީހާ ފަރުވާދިނުމަށް ހޮސްޕިޓަލަށް ގެންދިޔަ ކަމަށެވެ. އަދި މަންމައަށް އަނިޔާކުރު ދަރިފުޅު ހައްޔަރުކޮށްފައި ވަނީ މިއަދު ކޯޓު އަމުރެއްގެ ދަށުން ކަމުގައިވެސް ފުލުހުންގެ އިދާރާއިން ވިދާޅުވިއެވެ.

މިމައްސަލައިގައި ހައްޔަރުކޮށްފައި ވަނީ، މާލެ، ހ. އެހަޑަ، މުހައްމަދު އިސްމާއިލް (28އ) އެވެ.