"އެމް.އޭ.ސީ.އެލް ކެރިއަރ 2024" ގެ ނަމުގައި ސްކޫލްތަކުގެ ދަރިވަރުންނަށް ހާއްސަކޮށްގެން މޯލްޑިވްސް އެއަރޕޯޓްސް ކޮމްޕެނީ ލިމިޓެޑުން ފެށި، ޕްރޮގްރާމް ހުޅުމާލެ ޣާޒީ ސްކޫލުގައި ކުރިޔަށް ގެންގޮސްފިއެވެ.

އެމްއޭސީއެލްއިން ހާމަކުރައްވާފައިވާ ގޮތުގައި، ޣާޒީ ސްކޫލުގައި، ހޮނިހިރު ދުވަހު ބާއްވަފައި ވަނީ އެޕްރޮގްރާމްގެ ދަށުން ބޭއްވި ފުރަތަމަ ފެއާއެވެ.

އެކުންފުނިން ހާމަކޮށްފައިވާ ގޮތުގައި، މިއީ އެމް.އޭ.ސީ.އެލްގެ އިޖުތިމާޢީ ޒިންމާގެ ދަށުން އެމް.އޭ.ސީ.އެލްގައި ހުރި ވަޒީފާގެ ފުރުސަތުތަކަށް ސްކޫލްތަކުގެ ދަރިވަރުން ހޭލުންތެރިކުރުމުގެ ގޮތުން ކުރިއަށް ގެންދާ ހަރަކާތެކެވެ.

"އެމް.އޭ.ސީ.އެލް ކެރިއަރ 2024" ގެ އަމާޒަކީ އޭވިއޭޝަން ދާއިރާގެ އިތުރުން، އެއަރޕޯޓް އޮޕަރޭޝަންސްގައި ހުރި ވަޒީފާގެ ފުރުސަތުތަކާ ގުޅޭ މައުލޫމާތު ދަރިވަރުންނަށް ފޯރުކޮށްދީ، ދަރިވަރުންނަށް އެ ކުދިންގެ މުސްތަޤުބަލާއި މެދު ވިސްނުންތެރިކަމާއެކު ނިންމުންތައް ނިންމުމަށް އެހީތެރިވުން ކަމުގައި އެކުންފުނިން ވަނީ ހާމަކޮށްފައެެވެ. 

"އެމް.އޭ.ސީ.އެލް ކެރިއަރ 2024" ކުރިއަށް ގެންގޮސްފައި ވަނީ، 2 ސެޝަނަކަށް ބަހާލައިގެންނެވެ. އަދި ކޮންމެ ސެޝަންއެއްގައި ލަކީޑްރޯއެއް ނަގައި، ލަކީޑްރޯއިން ހޮވޭ 20 ދަރިވަރުންނަށް އެމް.އޭ.ސީ.އެލްގެ މަސައްކަތްތައް ގާތުން ބަލާލުމުގެ ފުރުޞަތު ދިނުމަށް ވަނީ ނިންމާފައެވެ. އަދި ފެއަރ ކުރިޔަށްދާ ވަގުތު ގުރުއަތުން ހޮވި 10 ދަރިވަރަކަށް ހަދިޔާ ދީފައިވެއެވެ.