ރާއްޖޭގެ ކަނޑުގެ ސަރަހައްދު ނުބެލެހެއްޓޭނަމަ ދިވެހި މަސްވެރިކަމަށް ނުރައްކާވާނެކަމުގައި ވިދާޅުވެ ރައްޔިތުންގެ މަޖިލީހުގެ ކެންދޫ ދާއިރާގެ މެމްބަރު މައުރޫފް ޒާކިރު ކަންބޮޑުވުން ފާޅުކުރައްވައިފިއެވެ.

މައުރޫފް ޒާކިރު، މިކަންބޮޑުވުން ފާޅު ކުރައްވާފައިވަނީ، ރާއްޖޭގެ ކަނޑުގެ ސަރަހައްދުގައި ޤާނޫނާއި ޚިލާފަށް މަސްވެރިކަން ކުރަމުންދާ ބޭރުގެ މަސްބޯޓެއްގެ ފޮޓޯ އާއި ވީޑިއޭ އެކްސްގައި އާއްމު ކުރައްވައި ލިޔުއްވި ޕޯސްޓްގައެވެ.

މައުރޫފް ވިދާޅުވީ، ރާއްޖޭގެ ކަނޑުގެ ސަރަހައްދުގައި ޤަވައިދާއި ހިލާފަށް ދ އަތޮޅާދިމާލުން 100 މޭލު ބޭރުގައި ބޭރުގެ މަސްބޯޓެއް މަސްވެރިކަން ކުރަމުންދާ ކަމަށެވެ. އަދި އެމައުލޫމާތު ކޯސްޓްގާރޑާއި ހިއްސާކުރެވިފައިވާ ކަމަށާއި، ރާއްޖޭގެ ސަރަހައްދު ބަލަހައްޓަން ގެނައި، ޑުރޯންގެ ހަބަރެއް ނުވާ ކަމުގައިވެސް އޭނާ ވިދާޅުވިއެވެ.

ރާއްޖޭގެ ކަނޑުގެ ސަރަހައްދުގައި ބޭރުގެ މަސްބޯޓުތައް ވަގަށް ވަދެ މަސްވެރިކަން ކުރަމުންދާ މައްސަލައިގައި މަސްވެރިން އަބަދުވެސް އައީ ކަންބޮޑުވުންފާޅުކުރަމުންނެވެ. އަދި ރާއްޖޭގެ ސަރަހައްދުން ދޭތެރެ ދޭތެރެއިން އެފަދަ މަސްބޯޓުތައް ކޯސްޓްގާޑުން އަތުލައިވެސް ގަނެއެވެ.