ސްޓެލްކޯއިން މިހާތަނަށް ހިންގާ ހަކަތައިގެ އެންމެ ބޮޑު މަޝްރޫޢު ހިންގުމަށް ޗައިނާ ކުންފުންޏަކާއި އެކު ފަހުމުނާމާގައި ސޮއިކޮށްފިއެވެ.

މިފަހުމުނާމާގައި، ސޮއިކުރުމުގެ ރަސްމިއްޔާތު ބާއްވާފައި ވަނީ، މިއަދު ހެނދުނު ސްޓެލްކޯގެ އޮޑިޓޯރިއަމްގައެވެ.

މި އެއްބަސްވުމާއި ގުޅޭ މައުލޫމާތު ހާމަކުރައްވައި، އެކުންފުނީގެ މެނޭޖިންގ ޑައިރެކްޓަރ ޙުސައިން ފަޙްމީ ވިދާޅުވީ،  ޗައިނާގެ ޓީބީއީއޭ ގްރޫޕު ކޯ ލިމިޓެޑާއެކު ހިންގުމަށް އެއްބަސް ވެވުނު މިމަޝްރޫޢުވެގެންދާނީ އެކުންފުނީގެ ތާރީޚުގައިވެސް މިހާތަނަށް ހިންގޭ ހަކަތައިގެ އެންމެ ބޮޑު މަޝްރޫޢަށް ކަމަށެވެ. 

މިގޮތުން މިއެއްބަސްވުމުގެ ދަށުން ކުރެވޭނެ މުހިއްމު ކަންކަމުގެ ތެރޭގައި، މާލެ، ވިލިގިލި، ގުޅީފަޅު އަދި ތިލަފުށި އެއް ގްރިޑަކުން ގުޅާލައި، އެ ސަރަޙައްދުތަކަށް ބޭނުންވާ ހަކަތަ ފޯރުކޮށްދެވޭނެ ހަރުދަނާ ނެޓްވޯކެއް ޤާއިމުކުރުން ހިމެނެއެވެ. މީގެ އިތުރުން މިމަޝްރޫޢުގެ ދަށުން، ތެލާއި ގުދުރަތީ ގޭހުން ކަރަންޓް އުފައްދާ 50 މެގަވޯޓުގެ ޕްލާންޓެއްވެސް ޤާއިމްކުރެވޭނެ ކަމުގައި ފަޙްމީ ވިދާޅުވިއެވެ.

ސްޓެލްކޯއިން ދަނީ ހަކަތައިގެ ޑިމާންޑާއި އެއްވަަރަށް ހަކަތަ އުފެއްދުމަށްޓަކައި ކުރަންޖެހޭ މަސައްކަތްތައް ދުރާލައި ރާވައި އިންފްރާސްޓްރަކްޗަރ ބިނާކުރުމުގެ މަސައްކަތްތައް ކުރަމުންނެވެ.