ވެސްޓް ޕާކާއި އައިޖީއެމްއެޗް އަދި ދިރާގު ކައިރީގައި ވަގުތީ ފެން ހިންދާ ނިޒާމުތައް ޤާއިމްކޮށް ނިމިފައިވާ ކަމުގައި ޑިފެންސް މިނިސްޓްރީން ހާމަކުރައްވައިފިއެވެ.

މިނިސްޓްރީ އޮފް ޑިފެންސް އިން ވިދާޅުވީ، މާލޭގެ ފެންބަޮޑުވުމުގެ މައްސަލައަށް ހައްލު ހޯދުމުގެ ގޮތުން، ވަގުތީ ފެން ހިންދާ ނިޒާމު ޤާއިމުކޮށް ޚިދުމަތްދިނުމަށް އާރްޑީސީއާ އެކުގައި، ޑިފެންސް މިނިސްޓްރީން 15 މެއި 2024 ގައި އެއްބަސްވުމެއްގައި ސޮއެކޮށްފައި ވާކަމަށެވެ. އެ އެއްބަސްވުމުގެ ދަށުން، ވަގުތީ ފެންހިންދާ ނިޒާމްތައް ޤާއިމް ކުރުމުގެ މަސައްކަތް ކުރެވިފައިވަނީ، ޑިފެންސް މިނިސްޓްރީގެ ޕްރޮޖެކްޓެއްގެ ގޮތުގައި ކަމަށްވެސް އެމިނިސްޓްރީން ވިދާޅުވެއެވެ.

ޑިފެންސް މިނިސްޓްރީން ހާމަކުރައްވާފައިވާ ގޮތުގައި އެޕްރޮޖެކްޓްގެ ދަށުން ވަގުތީ ފެންހިންދާ ނިޒާމްތައް ޤާއިމްކުރުމުގެ މަސައްކަތް ކުރެވެމުންދަނީ، އާޓީފިޝަލް ބީޗު ކައިރިން، މަޖީދީ މަގާއި ބޮޑުތަކުރުފާނު މަގު ގުޅޭ ސަރަހައްދާއި، ޓީވީމޯލްޑިވްސް ހިމެނޭ ސަރަހައްދާއި، އަމީނީ މަގު ނިމޭ ހިސާބުން ދިރާގު ކައިރިއާއި، އައިޖީއެމްއެޗް ސަރަހައްދުގެ އިތުރުން، ވެސްޓްޕާކު ސަރަހައްދެވެ. 

އަދި މިޕްރޮޖެކްޓްގެ ދަށުން ވަގުތީ ފެން ހިންދާ ނިޒާމްތައް ޤާއިމްކުރުމަށް ކަނޑައެޅި ފުރަތަމަ ތިން ސަރަހައްދުގެ މަސައްކަތް މިހާރު ނިމިފައިވާ ކަމުގައި ޑިފެންސް މިނިސްޓްރީން ހާމަކުރެއްވިއެވެ.

ޑިފެންސްމިނިސްޓްރީން ހާމަކޮށްފައިވާ ގޮތުގައި ފެންހިންދާ ނިޒާމްތައް ޤާއިމްކުރެވިފައިވާ ސަރަހައްދުތަކުގައި ފެން ހިންދުމަށް ހޮޅި އަޅައިގެން ކުރިން މަސައްކަތް ކުރާ ގޮތަށް ދެން ސިފައިން މަސައްކަތް ކުރާކަށް ނުޖެހޭނެއެވެ. 

އަދި ޑިފެންސް މިނިސްޓްރީގެ މި ޕްރޮޖެކްޓް ހިންގަމުން އަންނަނީ، ދައުލަތުގެ ބަޖެޓުން ހަރަދުކޮށްގެން، އެމްޑަބުލިޔުއެސްސީއާއި ހައުސިންގ މިނިސްޓްރީ އާއި ކޮންސްޓްރަކްޝަން މިނިސްޓްރީގެ ފަންނީ ލަފަޔާއި އެހީއާއި އެކު ކަމުގައި ޑިފެންސް މިނިސްޓްރީން ވަނީ ވިދާޅުފެވައެވެ.

މާލޭގެ ފަސް ސަރަހައްދުގައި ވަގުތީ ފެންހިންދާ ނިޒާމްތައް ޤާއިމް ކުރެއްވުމުގެ މި ޕްރިޖެކްޓަކީ ސަރުކާރުން 15 މިލިޔަނަށްވުރެ ގިނަ ރުފިޔާ ޚަރަދުކުރައްވައިގެން ހިންގަވާ މަޝްރޫޢެކެވެ.