މިސަރުކާރަކީ އޮޅުވާލުމާއި މަކަރު ހެދުމުގެ ސަރުކާރެއް ކަމަށާއި، ސަރުކާރުގެ އެންމެ މައިގަނޑު އެއް ފަލްސަފާއަކީ ކައުންސިލަރުންގެ އަގު ވައްޓާލުންކަމުގައި، އެމްޑީޕީގެ ރައީސް ޢަބްދުﷲ ޝާހިދު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، މިއަދު ކުޅުދުއްފުށީ ސިޓީގައި އެމްޑީޕީން ކުރިޔަށް ގެންދިޔަ، ލާމަރުކޒީ ގުޅުން - ކައުންސިލަރުންގެ ކޮންފަރެންސްގައި ވާހަކަފުޅު ދައްކަވަމުންނެވެ.

ރާއްޖޭގައި މިވަގުުތު ހުރި ސިޔާސީ އެންމެ ތަޖުރިބާކާރު ލީޑަރުންގެ ތެރޭގައި ހިމެނިވަޑައިގަންނަވާ، އެމްޑީޕީގެ ރައީސް ޢަބްދުﷲ ޝާހިދު ވިދާޅުވީ، ސަރުކާރުން ދަނީ، ކައުންސިލަރުންނަކީ ނެތް ބައެއް ކަމުގައި، އަދި ރައްޔިތުންގެ އިތުބާރު ނެތް ބައެއް ކަމުގައި ދައްކަމުން ކަމަށެވެ.

ޢަބުދުﷲ ޝާހިދު ވިދާޅުވީ، މިއަދު މިއޮތް ސަރުކާރުގެ ފިކުރަކީ ދޮގާއި މަކަރާއި އޮޅުވާލުމާއި ނަފުރަތު އުފެއްދުމުގެ ފިކުރެއް ކަމަށެވެ. އަދި މިސަރުކާރުގެ ފިކުރަކީ އަޅުވެތި ކުރުމާއި ބާރުތައް ޖަމާކޮށް އޭގެ މައްޗަށް، ވެރިގަތުމާއި، އަނިޔާވެރިކަމުގެ ފިކުރު ކަމަށެވެ.

ޢަބުދުﷲ ޝާހިދު ވިދާޅުވީ، މިއަދު މިހާލަތުގައި ރާއްޖެ އޮތުމުން، އެމްޑީޕީ ފަހަށް ނުޖެހޭނެ ކަމަށާއި، އެމްޑީޕީ އޮތީ ސާބިތުކަމާއި އެކު ކުރިޔަށް ދިޔުމަށް ކަމަށެވެ. އަދި އެމްޑީޕީގެ ފިކުރަކީ މިނިވަންކަމުގެ ފިކުރެއް ކަމަށާއި، އެފިކުރުގައި ވަނީ ރަށްތައް ގުޅާލުމާއި، ބަންދުން ވީއްލުމުގެ ފިކުރުކަމަށެވެ. އަދި ރައީސް އިބްރާހީމް މުޙައްމަދު ޞާލިޙްގެ ސަރުކާރުގައި މުޅި ރާއްޖެ، ދަތުރުފަތުރުގެ ނިޒާމުން ގުޅާލައި ދެއްވި ކަމަށްވެސް ޝާހިދު ވިދާޅުވިއެވެ.

ޝާހިދުގެ ވާހަކަފުޅުގައި، މިސަރުކާރުން މަސައްކަތް ކުރަމުން ދަނީ ލާމަރުކަޒީ ނިޒާމާއި ދިމާ ދެކޮޅަށް ކަން ފާހަގަކުރައްވައި، ވިދާޅުވީ، މިސަރުކާރުގެ އަމާޒަކީ، ރައްޔިތުން މާލެ ސަރަހައްދަށް ޖަމާކުރުމުގެ ވިސްނުން ކަމަށެވެ. އަދި ކުރީ ސަރުކާރުގައި ފަށާފައި ހުރި މަޝްރޫޢުތައް ވަނީ ހުއްޓާލާފައިކަންވެސް ޝާހިދު ފާހަގަކުރެއްވިއެވެ.