ލާމަރުކަޒީ ނިޒާމް ދިފާޢުކުރުމަށް ކައުންސިލަރުންގެ ފަރާތުން  ހުށައެޅި ޤަރާރު ލާމަރުކަޒީ ގުޅުން ކޮންފަރެންސްގައި ބައިވެރިވެވަޑައިގެންނެވި، ކައުންސިލަރުންނާއި ޑަބުލިޔުޑީސީ މެމްބަރުންގެ އިއްތިފާޤުން ފާސްކޮށްފިއެވެ.

މިޤަރާރު ހުށައެޅުއްވީ، ކުޅުދުއްފުށީ ސިޓީގެ މޭޔަރު މުޙައްމަދު އާތިފެވެ. 

އާތިފް ހުށައެޅުއްވި ޤަރާރުގައި ވިދާޅުވީ، ހިނގަމުންދާ 20 ވަނަ ރައްޔިތުންގެ މަޖިލީހުން ގެންދަނީ، ޤާނޫނު އަސާސީގެ ރޫޙާއި ޚިލާފަށް، ލާމަރުކަޒީ ޤާނޫނަށް ބަދަލު ގެނެސް ކައުސިލްތަކަށާއި ރައްޔިތުންނަށް އޮތް ބާރުތައް ނިގުޅައިގަންނަމުން ކަމަށެވެ. އަދި މި ސަރުކާރުން ގެންދަނީ ލާމަރުކަޒީ ޤާނޫނު އޭގެ ފުރިހަމަ މާނައިގައި ތަންފީޒްކުރުމަށް ކައުންސިލްތަކަށް އުނދަގޫތަކާއި ދަތިތައް ކުރިމަތި ކުރަމުން ކަމުގައިވެސް އާތިފް ހުށައެޅުއްވި ޤަރާރުގައި ވިދާޅުވެފައި ވެެއެވެ. 

ޤަރާރުގައި އިތުރަށް ވިދާޅުވެފައި ވަނީ، ލާމަރުކަޒީ ނިޒާމާއި ގުޅޭ ޤާނޫނުތައް ރައްޔިތުންގެ މަޖިލީހުން ފާސްކުރަމުން ގެންދަނީ، ކައުންސިލްތަކާއި ރާއްޖޭގެ ފަންނީ މާހިރުންނާއި، ކަމާއި ގުޅުންހުރި ޖަމިއްޔާ ޖަމާޢަތްތަކުން ހުށައަޅާފައިވާ އެއްވެސް ކަންބޮޑުވުމަކާއި، އިސްލާހަކަށް ބެލުމެއް ނެތި، ލާމަރުކަޒީ ނިޒާމަށް ނިކަމެތިކަން ލިބޭފަދަ ގޮތަކަށް ކަންވެސް ދެކޭ ކަމަށެވެ. އެހެންކަމުން އެފަދަ ޤާނޫނުތައް އިސްލާޙްކުރުމަށް ގޮވާލައި ކައުންސިލްތަކާއި، ޖަމިއްޔާ ޖަމާއަތްތަކުން ކުރަމުންގެންދާ އެންމެހާ މަސައްކަތްތަކަށް، ހިއްވަރުދީ އެފަދަ މަސައްކަތްތަކުގެ ބައިވެރިވެވެން އޮތް އެންމެ ފުޅާމިނެއްގައި އެމްޑީޕީން ބައިވެރިވެ ލާމަރުކަޒީ ނިޒާމް ދެމެހެއްޓުމަށް އެއިރެއްގައި ކުރަންޖެހުނު ކޮންމެ ކަމެއް ކުރުންމަތީ ތިބުމަށް އިޤުރާރުވާކަމުގައި އެ ޤަރާރުގައި ވަނީ ބުނެފައެވެ.

އާތިފް ހުށައެޅުއްވޮ އެޤަރާރަށް ވޯޓަށް އެހުމުން އެ ޤަރާރާއި އެއްގޮތަށް ޕާޓީން ކުރިޔަށް ދިޔުމަށް ފެންނަކަމަށް ފާސްކޮށްފައި ވަނީ، ކޮންފަރެންސްފައި ބައިވެރިވި ކައުންސިލަރުންނާއި ޑަބްލިޔުޑީސީ މެމްބަރުންގެ އިއްތިފާޤުންނެވެ.