ލާމަރުކަޒީ ގުޅުން މިނަމުގައި އެމްޑީޕީން މިއަދު ކުޅުދުއްފުށީ ސިޓީގައި ފެށި ކޮންފަރެންސްއަކީ ސިލްސިލާ ކޮންފަރެންސެއްގެ ގޮތުގައި ކުރިޔަށް ގެންދިޔުމަށް ހަމަޖައްސާފައިވާ ކޮންފަރެންސެއްކަމުގައި އެމްޑީޕީން ހާމަކޮށްފިއެވެ.

ލާމަރުކަޒީ ގުޅުން- ކައުންސިލަރުންގެ ކޮންފަރެންސްގެ ފުރަތަަމަ ކޮންފަރެންސް މިއަދު ފަށާފައި ވަނީ ކުޅުދުއްފުށީ ސިޓީގައެވެ. މި ކޮންފަރެންްސް ހުޅުވުމުގެ ރަސްމިއްޔާތުގައި ވާހަކަފުޅު ދައްކަވަމުން އެމްޑީޕީގެ ރައީސް، ޢަބްދުﷲ ޝާހިދު ވިދާޅުވީ، މިއަދު މި ކޮންފަރެންސް ކުޅުދުއްފުށި ސިޓީގައި ފެށިގެން ދިޔަ ނަމަވެސް ކުރިޔަށް އޮތް ތަނުގައި ރާއްޖޭގެ އެހެން ސަރަހައްދުތަކުގައިވެސް ބާއްވާނެ ކަމަށެވެ. 

ޢަބްދުﷲ ޝާހިދު ވިދާޅުވީ، އެމްޑީޕީއަށް ގެނެވުނު ބަދަލުގެ ތެރޭގައި ކައުންސިލަރުންގެ އެސެމްބްލީއާ ޑަބްލިޔުޑީސީގެ ވިންގެން އުފެދިގެން ދިޔަކަން އެއީ، ލާމަރުކަޒީ ނިޒާމު އެމްޑީޕީގެ ތެެރެއަށް ގެނައުމަށް ކުރެވެމުންދާ މަސައްކަތް ސާފުކޮށް ފެނިގެންދާ ކަމެއް ކަމަށެވެ. 

ދިވެހިރައްޔިތުންގެ ޑިމޮކްރަޓިކް ޕާޓީ (އެމްޑީޕީ) ގެ ފަރާތުން ލާމަރުކަޒީ ނިޒާމުގެ ދިފާއުގައި ބާއްވާ ‘ލާމަރުކަޒީ ގުޅުން – ކައުންސިލަރުންގެ ކޮންފަރެންސް ކުރިއަށްދަނީ އުތުރުގެ ތިން އަތޮޅުގެ ރަށްތަކުގައި އެމްޑީޕީއަށް ނިސްބަތްވެވަޑައިގަންނަވާ ކައުންސިލަރުންނާއި، ޑަބްލިއުޑީސީ މެމްބަރުންނާއި ޕާޓީގެ ލީޑަރޝިޕްގެ ބޭފުޅުންނާއެކު ކުޅުދުއްފުށި ސިޓީގަ އެވެ. އޭގެ ތެރޭގައި ބޮޑު ތިލަދުންމައްޗަށް ނިސްބަތްވެވަޑައިގަންނަވާ 55 ކައުންސިލަރުން ހިމެނެ އެވެ. ރާއްޖޭގެ ފަސް ސިޓީގެ މޭޔަރުން ވެސް މި ކޮންފަރެންސްގައި ބައިވެރިވެއެވެ.

މި ކޮންފަރެންސްގައި ބައިވެރިވާ ހުރިހާ ކައުންސިލަރުން ހާއްސަ އިގުރާރެއްގައި ސޮއިކުރުމަށް ފަހު އާންމު ކުރުމަށް ވެސް ވަނީ ހަމަޖެހިފައެވެ. އަދި އިސްލާހު ކުރަން ޖެހޭ ކަންކަން ފާހަގަކޮށް އެ ކަންކަން ކުރުމަށް ސަރުކާރަށް ކައުންސިލަރުންގެ ފަރާތުން ގޮވާލާނެއެވެ.