އިދިކޮޅު ޕާޓީ އެމްޑީޕީން ހދ. ކުޅުދުއްފުށީގައި ބާއްވާ، "ލާމަރުކަޒީ ގުޅުން"، ކައުންސިލަރުންގެ މަހާސިންތާގައި ބައިވެރިވެވަޑައިގެންނެވުމަށްޓަކައި، ކުރީގެ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް، ހދ. ކުޅުދުއްފުއްޓަށް ވަޑައިގެންފިއެވެ.

މި ކޮންފަރެންސްގައި ބައިވެރިވެވަޑައިގެންނެވުމަށްޓަކައި އެޕާޓީގެ ރައިސް ޢަބްދުﷲ ޝާހިދުވެެސް މިއަދު ވަނީ، ރައީސް ޞާލިޙާއި އެކުގައި ކުޅުދުއްފުށި ސިޓީއަށް ވަޑައިގެންފައެވެ.

މިހާރު ކުޅުދުއްފުށީ ސިޓީގައި ފެށިގެން ކުރިޔަށްދާ މިކޮންފަރެންސްގައި ބައިވެރިވަނީ، ހއ. ހދ. އަދި ށ. އަތޮޅުގައި ތިއްބެވި އެމްޑީޕީގެ ކައުންސިލަރުންނާއި، އަންހެނުންގެ ތަރައްޤީއަށް މަސައްކަތް ކުރައްވާ ކޮމިޓީތަކުގެ މެމްބަރުންނެވެ.

މި މަހާސިންތާ އާއި ގުޅޭ ގޮތުން އެމްޑީޕީގެ ޗެއާ ޕާރސަން ފައްޔާޒް އިސްމާޢީލް ވިދާޅުވީ، މި މަހާސިންތާގެ ބޭނުމަކީ، މިސަރުކާރުން ރާއްޖޭގެ ލާމަރުކަޒީ ނިޒާމް ހަލާކުކޮށްލުމަށް ކުރަމުންދާ މަސައްކަތްތައް ހުއްޓުވުން ކަމަށެވެ.

މި ކޮންފަރެންސްގައި 80އަށް ވުރެ ގިނަ މީހުން ވަނީ ބައިވެރިވެފައެވެ.