ދަރުމަވަންތަ ހޮސްޕިޓަލްގައި ޤާއިމްކޮށްފައިވާ ހައިބްރިޑް އޮޕަރޭޝަން ތިއޭޓަރު ބޭނުން ކުރަން ފަށާފައިވާ ކަމުގައި އައިޖީއެމްއެޗުން ހާމަކޮށްފިއެވެ.

އެ ހޮސްޕިޓަލުން މިކަން ހާމަކޮށްފައިވަނީ އެހޮސްޕިޓަލްގެ ސޯޝަލްމީޑިއާ އެކައުންޓްތަކުން ކުރި ޕޯސްޓެއްގައެވެ.

ރައީސް ޔާމީނުގެ ވެރިކަމުގައި އިމާރާތްކުރި 25 ބުރީގެ ދަރުމަވަންތަ ހޮސްޕިޓަލް ހިންގަމުން އަންނަނީ އައިޖީއެމްއެޗްގެ ބައެއްގެ ގޮތުގައެވެ. 

އައިޖީއެމްއެޗުން ވިދާޅުވީ، އެތިއޭޓަރަކީ، ދަރުމަވަންތަ ހޮސްޕިޓަލް 11 ވަނަ ފަންގިފިލާގައި ކެތު ލެބާއެކު ޤާއިމްކުރެވިފައިވާ ޒަމާނީ ހައިބްރިޑް އޮޕަރޭޓިން ތިއޭޓަރެއް ކަމަށެވެ. އަދި މިތިއޭޓަރު ބޭނުން ކުރެވެން ފެށުމާއި އެކު، ނިއުރޮލޮޖިކަލް، ކާޑިއެކް އަދި ޕެރިފެރަލް އިންޓަވެންޝަނަލް ޕްރޮސީޖަރތައް ދުނިޔޭގެ ފެންވަރު ރަނގަޅު ހޮސްޕިޓަލްތަކެކޭ އެއްފަދައިން އައިޖިއެމްއެޗުގައިވެސް ފޯރުކޮށްދެވޭނެ ކަމަށް އެހޮސްޕިޓަލުން ވަނީ ބުނެފައެވެ. އެހޮސްޕިޓަލުން ފާހަގަކޮށްފައިވާ ގޮތުގައި މި ތިއޭޓަރު ތަރައްޤީކުރެވި ބޭނުން ކުރެވެން ފެށުމަކީ، ރާއްޖޭގެ ޞިއްޙީ ޚިދުމަތުގައި ހޯދުނު އިތުރު ކުރިއެރުމެކެވެ.