މިއަހަރުގެ ނިމިވަން ދުވަސް ފާހަގަކުރުމަށް ޝިއާރެއްގެ ގޮތުގައި ކަނޑައަޅާފައިވަނީ "މިނިވަން އުފާ މުޅި ރާއްޖެއިން" މި ޝިޢާރެވެ. މިނިވަން ދުވަހުގެ ހަރަކާތްތައް ރޭ ނިންމާލާފައިވާއިރު ފެނިގެންދިޔައީ ހަފްތާއަކަށްވުރެ ދިގު ދެމިގެންދިޔަ މިނިވަން ދުވަހުގެ ހަރަކާތްތަކުގައި މިއަހަރު މުޅި ރާއްޖެއިން ކުދި ބޮޑު އެންމެން ވަރަށް އުފާވެރިކަމާއިއެކު ބައިވެރިވިތަނެވެ.  މިއީ ކޯވިޑް-19އާއި ގުޅިގެން ތިންއަހަރުގެ މެދުކެނޑުމަކަށްފަހު މިނިވަން ދުވަހުގެ ޙަރަކާތްތައް މިހާ ކުލަގަދަކޮށް ފާހަގަކުރި ފުރަތަމަ ފަހަރެވެ.

ހަރަކާތްތައް ފެށީ ޖުލައި މަހުގެ 25 ވަނަ ދުވަހުގެ ރޭ ރައީސުލްޖުމްޙޫރިއްޔާގެ ދެކަނބަލުން ބޭއްވި ރަސްމީ ބައްދަލުކޮށްލެވުމަކުންނެވެ. އެހެން އަހަރުތަކެކޭ އެއްގޮތައް ޖުލައި 26ވަނަ ދުވަހުގެ ހެނދުނު 6:00 ގައި ގައުމީ ދިދަ ނެގުމުގެ ރަސްމިއްޔާތު ރާއްޖޭގެ ހުރިހާ ރަށެއްގައި ވަނީ ކުރިއަށްގެންގޮސްފައެވެ. މާލޭގެ ދިދަ ނެގުމުގެ ރަސްމިއްޔާތުގައި ރައީސުލްޖުމްޙޫރިއްޔާގެ ދެކަނބަލުން ވަނީ ބައިވެރިވެޑައިގެންފައެވެ. އައްޑޫ ސިޓީގައި ދިދަ ނެގުމުގެ ރަސްމިއްޔާތުގައި ރައީސުލްޖުމްޙޫރިއްޔާގެ ނާއިބު ފައިސަލް ނަސީމް ބައިވެރިވެވަޑައިގަތެވެ. މިނިވަން ދުވަހާ ގުޅިގެން ކުރިއަށް ގެންދިޔަ ހަރަކާތްތައް ފެށުނީ ޖުލައި 26ވަނަ ދުވަހުގެ ރޭ ބޭއްވި މިނިވަންދުވަހުގެ ހެވިކަމާއި ކުޅިވަރުތަކާއެކުއެވެ. ގަލޮޅުދަނޑުގައި ބޭއްވި ހެވިކަމުގެ ކުޅިވަރުތަކުގައި ޖުމްލަ 9 ހުށަހެޅުމެއް ވަނީ ދައްކާލާފައެވެ.

މިނިވަނދުވަހުގެ ހަރަކާތްތަކުގެ ތެރޭގައި ހިމެނޭ ޕެރޭޑް އޮތީ 27 ވަނަ ދުވަހު ހަވީރުއެވެ. މާލޭގެ ބޮޑެތި މަގުތަކުގައި ކުރިއަށް ދިޔަ މިޕެރޭޑްގައި އެމްއެންޑިއެފްއާއި، ދިވެހިރާއްޖޭގެ ޤައުމީ ކެޑޭޓް ކޯގެ ޕެރޭޑާއި ރޫޓް މާޗްވަނީ ކުރިއަށް ގެންގޮސްފައެވެ. މާލޭގެ ބޮޑެތި މަގުތަކެއްގައި ކުރިއަށްގެންދިޔަ މި ރޫޓްމާޗް ބަލާލުމަށް ގިނަ އަދަދެއްގެ ބަޔަކު މާލޭގެ މަގުތަކަށް ވަނީ ނުކުމެފައެވެ. މިނިވަންދުވަހާ ގުޅުވައިގެން ބޭއްވި ފުޅަނދުބުރުގެ ހަރަކާތް އޮތީ 27 ވަނަ ދުވަހުގެ ރޭ މާލޭގައެވެ. މިއަހަރު ފުޅަނދު ބުރުގައި ސަރުކާރުގެ މުއައްސަސާތަކާ ކުންފުނިތައް ހިމެނޭހެން 8 ތަނަކުން 15 ފުޅަނދެއްވަނީ ދައްކާލާފައެވެ.

އަދި ޖުލައި 29 އިން އޮގަސްޓް 3 ވަނަ ދުވަހަށް ވަނީ ހުޅުމާލެ ސެންޓްރަލް ޕާކުގައި "މިނިވަން އުފާ" ކާނިވާ ކުރިއަށްގެންގޮސްފައެވެ. މިއީ މިފަދަ ގޮތަކަށް ރާއްޖޭގައި ބޭއްވި އެންމެ ބޮޑު އެއް ކާނިވަލެވެ.

މި ކާނިވަލަށް އާންމުންގެ ގިނަ އަދަދެއްގެ މީހުން ވަނީ ޒިޔާރަތްކޮށްފައެވެ. ރޭ މި ކާނިވާ ނިންމާލާފައިވަނީ ބަޑިބޭހުގެ ހަރަކާތްތަކާއިއެކުގައެވެ.