ސްޓޭޓް އިލެކްޓްރިކް ކޮމްޕެނީ، ސްޓެލްކޯގެ ލީޑަރޝިޕް އެންހޭންސްމަންޓް ޕްރޮގްރާމްގެ ހަތްވަނަ ބެޗްގެ ތަމްރީނުތައް ފަށައިފިއެވެ.

ސްޓެލްކޯގެ ހުރިހާ މުވައްޒަފުންނަށް އަމާޒުކޮށް ސިލްސިލާ ގޮތެއްގައި ކުރިޔަށްގެންދާ މި ޕްރޮގްރާމަކީ ގައުމީ ދިފާއީ ބާރުގެ އެހީތެރިކަމާއެކު ކުރިޔަށްގެންދާ ޕްރޮގްރާމެކެވެ.

ގިރިފުށީގައި ކުރިއަށް ގެންދާ މިޕްރޮގްރާމްގެ ދަށުން ހަތްވަނަ ބެޗްގެ ނިޔަލަށް ސްޓެލްކޯގެ 368 މުވައްޒަފުން ތަމްރީނު ފުރިހަމަކޮށްފައި ވެއެވެ. އަދި ހަތްވަނަ ބެޗްގައި 51 މުވައްޒަފުން ބައިވެރިވެ ތަމްރީން ފުރިހަމަ ކުރަމުންދެއެވެ.

މި ޕްރޮގްރާމަށް އިޝާރާތް ކުރައްވައި ސްޓެލްކޯގެ މެނޭޖިން ޑިރެކްޓަރ ހުސައިން ފަހުމީ ވިދާޅުވީ، ރައީސުލްޖުމްހޫރިއްޔާ ޑރ. މުޢިއްޒުގެ ލަފާފުޅާ އިރުޝާދުގެ ދަށުން އެންމެ އިސްކަމެއް ދެއްވައިގެން ކުރިއަށް ގެންދަވާ އެއްކަމަކީ ރައްޔިތުންނަށް ދެވޭ ޚިދުމަތުގެ ފެންވަަރު ރަނގަޅު ކުރުމާއި މުވައްޒަފުންގެ ހުނަރާއި ޤާބިލުކަން އިތުރުކުރުމުގެ މަސައްކަތް ކަމަށެވެ.

އެގޮތުން މި ޕްރޮގްރާމަކީ ކުންފުނީގެ ލަނޑުދަނޑިތައް ހާސިލުކުރުމަށާއި ކުރިއެރުމަށް މުހިންމު ކަމެއްކަން އޭނާ ފާހަގަ ކުރެއްވިއެވެ.

ފަހުމީ ވަނީ ލީޑަރޝިޕް އެންހޭންސްމަންޓް ޕްރޮގްރާމާ ގުޅިގެން ސިފައިންގެ އެންމެ މަތީ ވެރިޔާ، ރައީސް ޑރ. މުއިއްޒަށާއި، ޑިފެންސް މިނިސްޓަރ ޣައްސާން މައުމޫންގެ އިތުރުން، ސިފައިންގެ ވެރިންނަށް ޝުކުރު އަދާކުރައްވާފައެވެ.