ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ކުރީގެ ރައީސް ބައްސާމް އަދީލް ޖަލީލް އަމީން އެވެނިއުއިން ގަނެފައިވާ ދެ އެޕާޓްމަންޓް ފުލުހުންނާއި ހަވާލުކޮށްފިއެވެ.

ފުލުންގެ އިދާރާއިން އިއްޔެ ވަނީ މިރޭގެ 00:00 ގެ ކުރިން އެ އެޕާޓްމަންޓްތައް ފުލުހުންނާއި ހަވާލުކުރުމަށް ބައްސާމަށް އަންގާފައެވެ. ފުލުހުންގެ އިދާރާއިން މިރޭ ދަންވަރު މީޑިއާތަކަށް ފޮނުވި މެސެޖުގައި ބުނެފައި ވަނީ، އަންގާރަ ދުވަހުގެ ރޭގެ 00:00 ގެ ކުރިން ފުލުހުންގެ އެންގުމާއި އެއްގޮތަށް އެފްލެޓްތައް ފުލުހުންނާއި ހަވާލުކޮށްފައިވާ ކަމަށެވެ.

މިމަހުގެ 6 ވަނަ ދުވަހުގެ ކުރިން އެފްލެޓްތައް ފުލުހުންނާއި ހަވާލުކުރުމަށް ސެޕްޓެމްބަރު މަހުގެ 22 ވަނަ ދުވަހު ކޯޓުން އަމުރުކޮށްފައިވެއެވެ. އަދި ފުލުހުންގެ އިދާރާގައި ބައްސާމުގެ ފަރާތުން ވަނީ މިމަހުގެ ނިޔަލަށް އެތަން ހަވާލުކުރުން ފަސްކޮށްދިނުމަށް އެދިފައެވެ. އަދި އިންސާނިއްޔަތުކަމުގެ ނަޒަރަކުން ބަލައިގެން، އެތަން ހަވާލުކުރުން އޮކްޓޯބަރު 31އަށް ފަސްކޮށްދިން ކަމަށް ވިދާޅުވެ، ފުލުހުންގެ އިދާރާއިން މީޑިއާއަށް މައުލޫމާތުވެސް ހިއްސާކުރިއެވެ. އެހެން ނަމަވެސް އިއްޔެ ކުއްލިއަކަށް ފުލުހުން ނެރުނު އެހެން ބަޔާނެއްގައި ވިދާޅުވީ، އަންގާރަ ދުވަހުގެ ރޭގެ 00:00ގެ ކުރިން އެޕާޓްމަންޓްތައް ހަވާލުކުރުމަށް ބައްސާމަށް އަންގާފައިވާ ކަމަށެވެ.

އެ ދެފްލެޓަކީ، އެފްއޭއެމަށް ފީފާއިން ދީފައިވާ 1.9 މިލިއަން ޑޮލުގެ ތެރެއިން 1 މިިލިއަން ޑޮލަރު ވަގަށް ނަގައި، އެފައިސާ ބޭނުންކޮށްގެން ބައްސާމް ގަތް ކަމަށް ތުހުމަތު ކުރެވިފައިވާ ފްލެޓްތަކެކެވެ. އެ ދެ ފްލެޓްގައި ދިރިއުޅެމުން އައީ ބައްސާމާއި އޭނާއެ އާއިލާއެވެ.