ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ކުރީގެ ރައީސް ބައްސާމް އަދީލް ޖަލީލް އަމީން އެވެނިއުއިން ގަނެފައިވާ ދެ އެޕާޓްމަންޓް ފުލުހުންގެ ބެލުމުގެ ދަށަށް ގެންދިޔުން ފަސްކުރީ، އިންސާނިއްޔަތަށްޓަކައި ކަމުގައި ފުލުހުންގެ އިދާރާއިން ވިދާޅުވެއްޖެއެވެ.

ހުސްވި މަހުގެ 28 ވަނަ ދުވަހު ކޯޓުންވަނީ، އާދީއްތަ ދުވަހުގެ ކުރިން އެ ދެފްލެޓް ފުލުހުންނާއި ހަވާލުކުރުމަށް އަންގައި އަމުރުކޮށްފައެވެ. އެ ދެފްލެޓަކީ، އެފްއޭއެމަށް ފީފާއިން ދީފައިވާ 1.9 މިލިއަން ޑޮލުގެ ތެރެއިން 1 މިިލިއަން ޑޮލަރު ވަގަށް ނަގައި، އެފައިސާ ބޭނުންކޮށްގެން ބައްސާމް ގަތް ކަމަށް ތުހުމަތު ކުރެވިފައިވާ ފްލެޓްތަކެކެވެ. އެ ދެ ފްލެޓްގައި ދިރިއުޅެމުން އަންނީ ބައްސާމާއި އޭނާއެ އާއިލާއެވެ. ފުލުހުންގެ އިދާރާއިން ވިދާޅުވީ، އެ ފްލެޓްތަކުން ނުކުމެ އާއިލާ އާއިއެކު ދިރިއުޅޭނެތަނެއް ނެތުމާއި އެކު، ފްލެޓްތައް ހަވާލުކުރުން މިމަހުގެ 31 ވަނަ ދުވަހުގެ ނިޔަލަށް ފަސްކޮށްދިނުމަށް އެދި ބައްސާމުގެ ފަރާތުން ފުލުހުންނަށް ސިޓީއެއް ފޮނުވާފައިވާ ކަމަށެވެ.

މި އެޕާޓްމަންޓްތަކަކީ، ބައްސާމް ހުޅުމާލެ އަމީން އެވެނިއުއިން ގަނެފައިވާ ދެ އެޕާޓްމެންޓެވެ. އެއީ ޕެންޓްހައުސްއެއް ގޮތަށް ހުރި ލަގްޒަރީ އެޕާޓްމެންޓްތަކެކެވެ. އެ އެޕާޓްމަންޓްތައް ބައްސާމް ގަނެފައި ވަނީ، ފީފާއިން އެފްއޭއެމްއަށް ދިން ކޯވިޑް ލޯނުގެ 1.9 މިލިއަން ޑޮލަރުގެ ތެރެއިން އެއް މިލިއަން ޑޮލަރު ބޭނުންކޮށްގެންނެވެ. އަދި އެ އެޕާޓްމަންޓްތައް ބައްސާމް ގަނެފައި ވަނީ، 2021 ވަނަ އަހަރުގެ ތެރޭގައެވެ.

ދައުލަތުން ވަނީ ބައްސާމްގެ މައްޗަށް މަނީ ލޯންޑަރިންނާއި ޚިޔާނާތުގެ ދައުވާތައް އުފުލާފައެވެ. އަދި އެ ދައުވާތަކާއި ގުޅިގެން ބައްސާމުގެ ޕާސްޕޯޓުވެސް އޮތީ ހިފަހައްޓާފައެވެ.