ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ކުރީގެ ރައީސް ބައްސާމް އަދީލް ޖަލީލް އަމީން އެވެނިއުއިން ގަނެފައިވާ ދެ އެޕާޓްމަންޓް ފުލުހުންނާ ހަވާލުކުރުން ފަސްކޮށްދިނުމަށް ބައްސާމުގެ ފަރާތުން އެދިއްޖެއެވެ.

ފުލުހުންގެ އިދާރާއިން ހާމަކުރައްވާފައިވާ ގޮތުގައި ބައްސާމުގެ ފަރާތުން ވަނީ، އެޕާޓްމަންޓުތައް ހަވާލު ކުރުން އޮކްޓޯބަރު 31، ގެ ނިޔަލަށް ފަސްކޮށްދިނުމަށް އެދި ފުލުހުންނަށް ސިޓީއެއް ހުށައަޅާފައެވެ. އަދި އެސިޓީއަށް ޖަވާބު ދިނުމުގެ މަސައްކަތް ކުރަމުން އަންނަ ކަމުގައިވެސް، ފުލުހުންގެ އިދާރާއިން ވިދާޅުވިއެވެ.

ބައްސާމުގެ ފުލެޓްތައް، މިއަދުގެ ކުރިން ފުލުހުންނާއި ހަވާލުކުރުމަށް ސެޕްޓެމްބަރު މަހުގެ 28 ވަނަ ދުވަހު ކޯޓުން ވަނީ އަމުރުކޮށްފައެވެ. 

މި އެޕާޓްމަންޓްތަކަކީ، ބައްސާމް ހުޅުމާލެ އަމީން އެވެނިއުއިން ގަނެފައިވާ ދެ އެޕާޓްމެންޓެވެ. އެއީ ޕެންޓްހައުސްއެއް ގޮތަށް ހުރި ލަގްޒަރީ އެޕާޓްމެންޓްތަކެކެވެ. އެ އެޕާޓްމަންޓްތައް ބައްސާމް ގަނެފައި ވަނީ، ފީފާއިން އެފްއޭއެމްއަށް ދިން ކޯވިޑް ލޯނުގެ 1.9 މިލިއަން ޑޮލަރުގެ ތެރެއިން އެއް މިލިއަން ޑޮލަރު ބޭނުންކޮށްގެންނެވެ. އަދި އެ އެޕާޓްމަންޓްތައް ބައްސާމް ގަނެފައި ވަނީ، 2021 ވަނަ އަހަރުގެ ތެރޭގައެވެ.

ދައުލަތުން ވަނީ ބައްސާމްގެ މައްޗަށް މަނީ ލޯންޑަރިންނާއި ޚިޔާނާތުގެ ދައުވާތައް އުފުލާފައެވެ. އަދި އެ ދައުވާތަކާއި ގުޅިގެން ބައްސާމުގެ ޕާސްޕޯޓުވެސް އޮތީ ހިފަހައްޓާފައެވެ.