ރައީސުލްޖުމްހޫރިއްޔާ އިންޑިއާއަށް ވަޑައިގަންނަވަނީ އިންޑިއާ ސަރުކާރުން ފޮނުއްވި އެޤައުމުގެ އަސްކަރިއްޔާއިން ބޭނުންކުރާ މަތިންދާ ބޯޓެއްގައި ކަމުގައި އިންޑިއާ މީޑިއާތަކުން ބުނެފިއެވެ.

މީގެ ކުރިންވެސް ރާއްޖޭގެ ރައީސުން އިންޑިއާއަށް ކުރައްވާ ފުރަމާނަ ދަތުރުފުޅުތަކުގައި ވަޑައިގެންނެވުމަށް މަތިންދާ ބޯޓުތައް ހަމަޖައްސަައި ދެއްވަނީ އެޤައުމުގެ ސަރުކާރުންނެވެ. އަދި އެ ފްލައިޓް ޖައްސާނީ، ދިއްލީގައިވާ ޕަލަމް އެއާބޭސްއަށެވެ. އެއީ ދިއްލީ އެއާޕޯޓާއި އެކުގައިވާ އެއާބޭސް އެކެވެ. 

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިންޑިއާކުރައްވާ މިދަތުރުފުޅާއި ގުޅިގެން އެމަނިކުފާނަށް މަރުހަބާ ދެންނެވުމަށްޓަކައި ދިއްލީ ވަނީ، އިންޑިއާ އާއި ދިވެހިރާއްޖޭގެ ޤައުމީ ދިދައިން ޒީނަތްތެރިކޮށްފައެވެ. ރައީސުލްޖުމްހޫރިއްޔާގެ މިދަތުރުފުޅަށް އިންޑިއާގެ މީޑިއާއިންވެސް ޚާއްޞަ ސަމާލުކަމެއް ދީފައި ވާއިރު، އެމަނިކުފާނު ވެރިކަމަށް ވަޑައިގެންނެވުމަށް ކުރެއްވި އިންޑިއާއައުޓް ކެމްޕޭނުގެ ވާހަކަތައްވެސް އިންޑިއާގެ މީޑިއާތަކުން ވަނީ އައުކޮށްފައެވެ.

ރައީސުލްޖުމްހޫރިއްޔާގެ މިދަތުރުފުޅުގައި އިންޑިއާގެ ވެރިރަށް ނިއުދިއްލީއަށް ވަޑައިގަންނަވާނީ، މިއަދުގެ ހަވީރުގެ ވަގުތެއްގައެވެ.

ރައީސުލްޖުމްހޫރިއްޔާގެ މިދަތުރުފުޅުގައި އިންޑިއާ ސަރުކާރުގެ އިސްބޭފުޅުންނާއިއެކު މަތީފެންވަރުގެ މަޝްވަރާތައް ބާއްވާނެއެވެ.