ސްކޫލުކުދިންތަކެއް ވެގެން އެހެން ކުއްޖަކަށް އަނިޔާކޮށް އޮރިޔާންކޮށް ބްލެކް މެއިލްކުރިމަށް ބުނާ މައްސަަލައެއް ފުލުހުންގެ ސަމާލުކަމަށް އައިސްފައިވާ ކަމަށާއި އެމައްސަލަ ބަލަމުން އަންނަ ކަމުގައި ފުލުހުންގެ އިދާރާއިން ވިދާޅުވެއްޖެއެވެ.

ފުލުހުންގެ އިދާރާއިން ވިދާޅުވީ ކަމާއި ގުޅުންހުރި އިދާރާތަކާއި ގުޅިގެން އެކަމާއި ގުޅޭ މައުލޫމާތު ހޯދުމުގެ މަސައްކަތް ކުރަމުންދާ ކަމަށެވެ.

އެނގިފައިވާ ގޮތުގައި އެކަން ހިނގާފައި ވަނީ، ހައްދުންމަތީ ގަމުގައެވެ. އަދި އެކަމުގައި ޝާމިލްވެފައި ވަނީ ގަމުގެ ހަމަދު ބިން ޚަލީފާ އާލްޘާނީ ސްކޫލުގައި ކިޔަވަމުން އައި ދަރިވަރުންތަކެކެވެ. އަނިޔާ ލިބުނު ކުއްޖާގެ މަންމަ ވަނީ އެހާދިސާގެ މައުލޫމާތު ސޯޝަލް މީޑިއާގައި ހާމަކޮށް، އަދި އެކުއްޖާއަށް އަނިޔާދިން ކުދިންގެ ފަރާތުން ލިިބިފައި ހުރި މެެސެޖުތައްވެސް އާއްމުކޮށްފައެވެ. އެމެސެޖުތަކުން އެނގޭ ގޮތުގައި އެގުރޫޕުގައި ހިމެނޭ ކުދިން ވަނީ، އެކުއްޖާއަށް ބިރުދައްކައިގެން ފައިސާ ހޯދުމަށް މަސައްކަތް ކޮށްފައެވެ. އަދި މަރާލާނެ ކަމުގެ އިންޒާރުވެސް ދީފައިވެއެވެ.

ކުއްޖާގެ މަންމަ ސޯޝަލް މީޑިއާގައި ހާމަކޮށްފައިވާ ގޮތުގައި އެގުރޫޕުން ކުއްޖާ، ގޭގައި ނިދާފައި އޮއްވައި، ކޮޓަރީގެ ކުޑަދޮރަކުން ވަދެ އެ ކުއްޖާގަދަކަމުން ބޭރަށް ގެންގޮސް އޮރިޔާންކޮށް ވީޑިއޯކޮށް އަދި ތަޅައި އަނިޔާކޮށްފައިވެއެވެ. އަދި އެގުރޫޕުގެ ކުދިން ހިމެނޭ ސޯޝަލްމީޑިއާ ގްރޫޕެއްގައި އެވީޑިއޯ ޕޯސްޓްވެސް ކޮށްފައިވެއެވެ.

ކުއްޖާގެ މަންމަ ވަނީ، ކުއްޖާއަށް އިންސާފު ލިބިދާނެތޯވެސް ސުވާލު އުފައްދައި ސޯޝަލްމީޑިއާގައި ކަންބޮޑުވުން ފާޅުކޮށްފައެވެ.