ފޮރިން މިނިސްޓަރ ޑރ. ޢަބްދުﷲ ޚަލީލު، ރާއްޖޭގައި ހުންނަވާ އިންޑިއާ ސަފީރު މުނޫ މަހާވަރު އާ ބައްދަލު ކުރައްވައިފި އެވެ.

މިއީ އެމަނިކުފާނު ފޮރިން މިނިސްޓަރުކަމާއި ހަވާލުވެވަޑައިގެންނެވުމަށްފަހުގައި ބޭރުގެ ސަފީރަކާއި ބައްދަލު ކުރެއްވި ފުރަތަމަ ފަހަރެވެ.

އެބައްދަލުކުރެއްވުމާއި ގުޅޭ ގޮތުން، ފޮރިން މިނިސްޓަރ ޑރ. ޢަބްދުﷲ ޚަލީލު އެކްސްގައި ކުރެއްވި ޕޯސްޓްގައި ވިދާޅުވީ، އެބައްދަލުވުމުގައި މަޝްވަރާކުރެއްވުނީ، އިންޑިއާ އާއި ދިވެހިރާއްޖޭގެ ގުޅުން މިހާރަށްވުރެ އިތުރަށް ބަދަހިކުރުމަށް ކުރެވިދާނޭ ކަންކަމާއި ގުޅޭ ގޮތުންނެވެ. 

ޑރ. ޢަބްދުﷲ ޚަލީލު ފޮރިން މިނިސްޓަރުގެ މަޤާމަށް ޢައްޔަނުކޮށްފައި ވަނީ އިއްޔެއެވެ. އެމަނިކުފާނު ކުރިން ހުއްނެވީ މިނިސްޓްރީ އޮފް ހެލްތުގެ މަޤާމުގައެވެ.

މަޤާމާއި ހަވާލުވެވަޑައިގެންނެވި ގޮތަށް އެންމެ ފުރަތަމަ އިންޑިއާ ސަފީރާއި، ފޮރިން މިނިސްޓަރ ބައްދަލުކުރެއްވި އިރު މިމަހުގެ ދެވަނަ ހަފްތާގައި ރައީސުލްޖުމްހޫރިއްޔާ ރަސްމީ ދަތުރުފުޅެއްގައި އިންޑިއާއަށް ވަޑައިގެންނެވުމަށް ހަމަޖެހިފައިވާ ކަމުގައި ސަރުކާރުން ވަނީ ހާމަކުރައްވާފައެވެ.

މިސަރުކާރު ވެރިކަމަށް އައުމަށް ކުރިޔަށް ގެންދިޔަ އިންޑިއާ އައުޓް ކެމްޕޭނުގެ ސަބަބުން އިންޑިއާ އާާއި ރާއްޖޭގެ ގުޅުން ހީނަރުވެގެން ދިޔަ ނަމަވެސް، އިންޑިއާ އާއެކު ގުޅުންތައް ބަދަހި ކުރުމަށް މިސަރުކާރުން އަންނަނީ މަސައްކަތްތައް ކުރަމުންނެވެ.