ދިވެހިރާއްޖޭގެ މިނިވަންކަމަށް 58 އަހަރު ފުރުމުގެ މުނާޞަބަތާއި ގުޅުވައިގެން ކުރިޔަށް ގެންދިޔަ، މިނިވަން އުފާ ކާނިވާ ނިންމާލައިފިއެވެ. 

މިނިވަން އުފާ ކާނިވާ ކުރިޔަށް ގެންގޮސްފައި ވަނީ، ޖުލައި 29 އިން އޮގަސްޓް 3 އަށެވެ. ތަފާތު ގިނަ ކުޅިވަރުގެ ހަރަކާތްތަކާއި އެކު ކުރިޔަށް ގެންދިޔަ މިނިވަން އުފާ ކާނިވަލް ނިންމާލުމުގެ ގޮތުންވެސް ރޭ ވަނީ ހަވާއަރުވާފައެވެ.

ޖުލައި 29 ވަނަ ދުވަހުގެ ރޭ މިނިވަން އުފާ ކާނިވާ ހުޅުއްވައި ދެއްވީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހެވެ. ކާނިވާ ހުޅުވިރޭގައިވެސް ހަވާ އަރުވާފައި ވާއިރު، އެރޭ ދައްކާލި ޑްރޯން ޝޯ އަކީ މިހާތަނަށް ރާއްޖޭގައި ބޭއްވި އެންމެ ފުރިހަމަ ޑްރޯން ޝޯ އެވެ. ޑްރޯން ޝޯގައި 300 ޑްރޯން ބޭނުންކޮށްފައިވެއެވެ.

ކާނިވާ ހުޅުވިރޭ މޫސުމް ތަން ނުދިނުމުގެ ސަބަބުން އެރޭ ބާއްވަން ހަމަޖައްސާފައި އޮތް، ރެޑް ބުލް ޕެރަމޮޓޯ ހަރަކާތް ދައްކާލާފައި ވަނީ ޖުލައި 30 ވަނަ ދުވަހުގެ ރޭގައެވެ.

މިނިވަން ދުވަހާއި ގުޅުވައިގެން ކުރިޔަށް ގެންދިޔަ ފުޅަނދު ބުރުގައި ބައިވެރި ކުރި ފުޅަނދުތައްވެސް، ކާނިވާ ކުރިޔަށް ދިޔައިރު ސެންޓްރަލް ޕާކުގައި ދައްކާލާފައިވެއެވެ.

މިނިސްޓްރީ އޮފް ހޯމް އެފެއާޒާއި އާބަންކޯ ގުޅިގެން ހުޅުމާލެ ސެންޓްރަލް ޕާކުގައި ކުރިޔަށް ގެންދިޔަ މިނިވަން އުފާ ކާނިވަލަށް، އެތައްހާސް ބަޔަކު ޒިޔާރަތްކުރިއެވެ.

މިއީ 2019 ވަނަ އަހަރު ކުރިމަތިވި، ކޯވިޑް-19ގެ ޢާލަމީ ބަލިމަޑުކަމަށްފަހު ރާއްޖޭގައި އެންމެ ކުލަގަދަކޮށް މިނިވަން ދުވަހުގެ ހަރަކާތްތައް ފާހަގަކުރި އަހަރެވެ.