ޖޯރޭގެ އާއިލާއަށް ރައީސް ޞާލިޙާއި ރައީސް ނަޝީދާއި އެމްޑީޕީގެ އިސްބޭފުޅުން ތަޢުޒިޔާ ވިދާޅުވެއްޖެއެވެ.

ހ. ވެލަސްފަރުގުގޭ އިބްރާހިމް ޖައުހަރީ، (ޖޯރޭ) މަރުވެފައި އޮއްވައި ފެނުނީ މިއަދު ހަވީރު، މާލޭ އުސްފަސްގަނޑާއި ދިމާ ކަނޑު ތެރެއިންނެވެ. އޭނާއަކީ، 2005 ވަނަ އަހަރު އެމްޑީޕީ އުފެދުނީއްސުރެ އެމްޑީޕީގެ އެކި ހަރަކާތްތައް ކަވަރު ކުރުމުގައި ފޮޓޯ ގްރާފަރެއްގެ ހައިސިއްޔަތުންނާއި ވީޑިއޯ ގްރާފަރެއްގެ ހައިސިއްޔަތުން މަސައްކަތް ކުރި މީހެކެވެ. އެމްޑީޕީގެ ތާރީޚީ ވަރަށް ގިނަ ބައްދަލުވުންތަކާއި ހަރަކާތްތައް އޭނާ ކަވަރުކޮޮށްފައިވެއެވެ.

ޖޯރޭ ނިޔާވުމުގެ ހިތާމައިގައި އެމްޑީޕީގެ ކުރީގެ ދެރައީސުން އަދި ދިވެހިރާއްޖޭގެ ރައީސުލްޖުމްހޫރިއްޔާކަން ކުރައްވާފައިވާ ދެބޭފުޅުން ކަމުގައިވާ، ކުރީގެ ރައީސް މުޙައްމަދު ނަޝީދާއު ކުރީގެ ރައީސް އިބްރާހީމް މުޙައްމަދު ޞާލިޙްވެސް ވަނީ ޖައުހަރީގެ އާއިލާއަށް ތައުޒިޔާ ވިދާޅުވެފައެވެ. 

ރައީސް ނަޝީދު އެކްސްގައި ކުރެއްވި ޕޯސްޓުގައި ވިދާޅުވީ، ޖައުހަރީއަކީ، ހުނަރުވެރި ކުޅަދާނަ ފޮޓޯގްރާފަރެއް ކަމަށާއި، އިސްލާޙީ ހަރަކާތްތަކުގެ އެންމެހައި މަންޒަރުތައް ކަވަރުކޮށްދިން ވަރުގަދަ ޚިދުމަތްތެރިއެއް ކަމަށެވެ. 

ރައީސް ޞާލިޙް ވެސް ވިދާޅުވީ، އިބްރާހިމް ޖައުހަރީ (ޖޯރޭ)އަކީ ރާއްޖޭގައި ސިޔާސީ އިޞްލާޙީ މަސައްކަތުގެ ފާހަގަކޮށްލެވޭ ބައިވެރިއެއް އަދި އެމް.ޑީ.ޕީ އަށް އަގުހުރި ޚިދުމަތްތަކެއް ކޮށްދެއްވި ކުޅަދާނަ ފޮޓޯގްރާފަރެއް ކަމަށެވެ.  

އެމްޑީޕީގެ ޗެއާޕާރސަން ފައްޔާޒު އިސްމާޢީލްގެ އެކްސްގައި ކުރެއްވި ޕޯސްޓުގައި ވިދާޅުވީ، ރާއްޖޭގެ އިސްލާހީ ހަރަކާތުގައި އިސްކޮށް ހަރަކާތްތެރިވެ ޑިމޮކްރަސީއަށް ކުރި ދަތުރުގެ މަންޒަރުތައް ގެނެސްދިން އިބްރާހިމް ޖައުހަރީ ނިޔާވި ހަބަރު އެހީ ފުން ހިތާމަޔާއެކުގައި ކަމަށާއި، ޖޯރޭއަކީ އެމްޑީޕީއަށް އިހުލާސްތެރި ހިދުމަތްތަކެއް ކޮށްދެއްވި ވަރުގަދަ އެކްޓިވިސްޓެއް ކަމަށެވެ.