މާލޭގެ ދެކުނު ފަރާތުން އުސް ފަސްގަނޑާއި ދިމާއިން ކަނޑުމަތިިން މަރުވެފައިވާ މީހެއްގެ ހަށިގަނޑު އޮޔާދަނިކޮށް ފެނިފައިވާ ކަމުގައި ފުލުހުންގެ އިދާރާއިން ވިދާޅުވެއްޖެއެވެ.

ފުލުހުންގެ އިދާރާއިން ވިދާޅުވީ، މަރުވެފައި އޮއްވައި އެމީހާ ފެނިފައި ވަނީ މިއަދުގެ 17:06 ހާއިރުގައި ކަމަށެވެ. މަރުވެފައި އޮއްވައި ފެނުނު މީހާއަކީ ދިވެހި ފިރިހެނެއްކަން މިހާތަނަށް ބެލި ބެލުމުން އެނގިފައިވާ ކަމަށާއި، އެމީހާ ހޮސްޕިޓަލަށް ގެންދިޔައިރުވެސް އޮތީ މަރުވެފައި ކަމުގައި ހޮސްޕިޓަލުން މައުލޫމާތު ދީފައިވާ ކަމުގައި ފުލުހުންގެ އިދާރާއިން ވިދާޅުވިއެވެ.

މަރުވެފައި އޮތް މީހަކު މާލޭގެ ދެކުނު ފަރާތުން ވާދޫ ކަނޑުތެރެއިން ފެނިފައިވާ ކަމަށް ފުލުހުން ބުނެފައިވާއިރު، މިފަހުން މީހަކު ގެއްލުނު ކަމުގެ ރިޕޯޓެއް ނެތެވެ. އެހެން ނަމަވެސް، މީގެ އެއްމަސްދުވަސް ކުރިން، މާލެ އަތޮޅު ފިނޮޅަކަށް ދަތުރު ގޮސް އުޅެނިކޮށް ގެއްލުނު މއ. އަސަރީ ހަނދާން، މުހައްމަދު ތަސްލީމް، 43, ހޯދުމުގެ މަސައްކަތް ފުލުހުން އަންނަނީ ކުރަމުންނެވެ.