ސެޕްޓެމްބަރު މަހުގެ 9 ވަނަ ދުވަހު ބާއްވާ ރިޔާސީ އިންތިޚާބުގައި ވޯޓުލުމަށް ރީ-ރެޖިސްޓްރީ ކުރަން ބޭނުންވާ ފަރާތްތަކަށް ފޯމު ހުށައެޅުމަށް ދީފައިވާ ސުންގަނޑި މާދަމާގެ 16:00އަށް ހަމަވާނެ ކަމަށާއި، އިތުރަށް މުއްދަތު އިތުރުކުރުމަށް ވިސްނާފައި ނުވާކަމުގައި އެކޮމިޝަނުން ބުނެފިއެވެ.

އިލެކްޝަންސް ކޮމިޝަނުން ބުނެފައިވަނީ، ރީ-ރެޖިސްޓްރޭޝަނަށް ފޯމު ހުށައެޅުމަށް މިހާރު ދީފައިވާ ސުންގަނޑިއަކީ، އޮގަސްޓް 5 ވާ ހޮނިހިރު ދުވަހުގެ ހަވީރު 16:00އަށް ކަމަށެވެ. އެމުއްދަތާއި ހަމައަށް ރީރެޖިސްޓްރީ ކުރަން ހުށަނާޅާ ފަރާތްތަކަށް ދެން އެފުރުޞަތެއް ނުލިބޭނެއެވެ.

ރީރެޖިސްޓްރޭޝަނަށް ހުޅުވާލުމުން މިހާތަނަށް ތިރީސް ހާހަށްވުރެ ގިނަ ފޯމް ވަނީ ރީރެޖިސްޓްރީ ކުރުމަށް ހުށައަޅާފައެވެ. ތިމާ ރަށްވެހިވެފައިވާ ރަށުގައި ވޯޓުލާ މީހުން އެންމެ ފަހުން ބޭއްވި އިންތިޚާުބުގައިވެސް ވޯޓުލާފައި ވަނީ، ރަށްވެހިވެފައިވާ ރަށުގައި ކަމަށް ވާނަމަ އިތުރަށް ރީރެޖިސްޓްރޭޝަނަށް ހުށައަޅާކަށް ނުޖެހޭނެއެވެ.

ރިޔާސީ އިންތިޚާބަށް ރީރެޖިސްޓްރީ ވުމަށް އޮންލައިންކޮށާއި އަދި ފޯމުންވެސް ހުށައެޅުމަށް ފުރުޞަތު ހުޅުވާލިއެވެ. އޮންލައިންކޮށް ރީރެޖިސްޓްރީވުމަށް ހުޅުވާލި ފުރުޞަތު ވަނީ ބުދަދުވަހުގެ ނިޔަަށް ހަމަވެފައެވެ.

އިންތިޚާބުގެ ވޯޓުލުމަށް ތިމާ ރަޖިސްޓްރީ ވެފައިވާ ތަން ބެލުމަށް 1414އަށް މެސެޖްކޮށްގެން އަދި އިލެކްޝަންސް ކޮމިޝަންގެ ޕޯޓަލް މެދުވެރިކޮށާއި ކޯލް ސެންޓަރަށް ގުޅައިގެންވެސް ބެލޭނެއެވެ.