އިސްލާމިކް މިނިސްޓަރީގެ ނައިބެއްގެ ފެންވަރުގައި ސަލްމާން މިސްކިތުގެ އިމާމަކަށް ޢައްޔަނުކޮށްފައިވާ، އަބްދުލްޖަލީލް އިސްމާއިލަށް ތުހުމަތު ކުރެވޭ މަކަރާއި ހީލަތް ހެދުމުގެ މައްސަލައެއް ހުށައެޅި ބަލަމުންދާ ކަމުގައި ފުލުހުންގެ އިދާރާއިން ވިދާޅުވެއްޖެއެވެ.

ފުލުހުންގެ އިދާރާއިން ވިދާޅުވީ، ފޯޖަރީ މައްސަލައެއް ސެޕްޓެމްބަރު މަހުގެ 19 ވަނަ ދުވަހު ފުލުހުންނަށް ހުށައަޅާފައިވާ ކަމަށާއި، އެމައްސަލަ ފުލުހުން ތަޙްޤީޤު ކުރަމުންދާ ކަމަށެވެ.

އެމައްސަލަ ޖަލީލާއި ދެކޮޅަށް ހުށައަޅާފައި ވަނީ، މާފަންނު، ގެއެއްގެ ތެރޭގައި މަރުވެފައި އޮއްވައި ފެނުނު، ހއ. ހޯރަފުށި، ޑީންސްވިލާގޭ، ހާޝިމް މުހައްމަދު، 44، އާއިލާއިންނެވެ. ހާޝިމްގެ މަރާއި މެދު ޝައްކުތަކެއް ހުރުމުން އެކަން ތަޙްޤީޤު ކުރާކަމަށް ބުނުން ފިޔަވައި އެމަރާއި ގުޅޭ ގޮތުން ފުލުހުން އިތުރު މައުލޫމާތެއް ހާމަކޮށްފައެއް ނުވެއެވެ. އަދި އެމަރުގެ މައްސަލައިގައި އާއިލާއިން ތުހުމަތު ކުރާ ބިދޭސީ މީހާ ވަނީ، ރާއްޖެއިން ޑީޕޯޓްވެސްކޮށްފައެވެ.

ހާޝިމްގެ އާއިލާއިން ބުނާ ގޮތުގައި ބިދޭސީ މީހާ އާއި ޖަލީލު ގުޅިގެން ހާޝިމްގެ ވިޔަފާރިތަކާއި މުދަލާއި ފައިސާ، ޖަލީލުގެ ޙިއްޞާ އޮންނަ ކުންފުންޏެއްގެ ނަަމަށް ބަދަލުކޮށްފައި ވަނީ، ފޯޖުކޮށް ލިޔެކިޔުންތައް އުފައްދައިގެންނެވެ.

ހާޝިމް ހިންގި ފިހާރަ ޖަލީލު މިހާރު ހިންގަމުންދާއިރު، އާއިލާއިން އެފިހާރަނަށް 23 ސެޕްޓެމްބަރުގައި ވަތް އިރު، ހިނގި ހަމަނުޖެހުމެއްގެ ވީޑިއޯއެއް ސޯޝަލް މީޑިއާގައި ދަނީ ދައުރުވަމުންނެވެ. އެކަމާއި ގުޅޭ ގޮތުން ފުލުހުން ބުނެފައި ވަނީ، މުދަލާއި ގޯތި ގެދޮރުގެ މައްސަލަ ސިވިލްކޯޓަށް ހުށައަޅައިގެން ކުރިޔަށް ގެންދިޔުމަށް ފުލުހުންގެ އިދާރާއިން އެ ދެފަރާތަށް އަންގާފައިވާ ކަމަށެވެ.