ޝަހުސު އޮޅުވާލައިގެން ވެލާނާ އިންޓަރނޭޝަނަލް އެއަރޕޯޓުން ރާއްޖެ އެތެރެވާން އުޅުނު 03 ބިދޭސީއަކު ވަނީ ހުއްޓުވާފައިވާ ކަމުގައި މޯލްޑިވްސް އިމިގްރޭޝަނުން ވިދާޅުވެއްޖެއެވެ.

އިމިގްރޭޝަނުން ޙާމަކުރައްވާފައިވާ ގޮތުގައި، ހިފެހެއްޓި ތިން މީހުންނަކީ އުމުރުން 21 އަހަރާއި 25 އަހަރާއި ދެމެދުގެ ތިން މީހުންނެވެ. އޭގެ ތެރެއިން އުމުރުން 25 އަހަރުގެ މީހާ ހިފަހައްޓާފައި ވަނީ ޖުލައި މަހުގެ 31 ވަނަ ދުވަހުގައެވެ. ދެވަނަ މީހާ އޮގަސްޓް މަހުގެ 16 ަނަ ދުވަހު ހިފެހެއްޓި އިރު، ތިންވަނަ މީހާ ހިފަހައްޓާފައި ވަނީ އޮގަސްޓް މަހުގެ 18 ވަނަ ދުވަހުގައެވެ.

މިތިން މީހުން އިމިގްރޭޝަންގެ ބެލުމުގެ ދަށަށް ގެންދިޔަ ނަމަވެސް އެމީހުން ނިސްބަތްވާ ޤައުމަކާއި އެއީ ކޮންކަމެއްގައި ރާއްޖެ އެތެރެވާން މަސައްކަތް ކުރި ބައެއް ކަމެއް އިމިގްރޭޝަނުން ހާމަކުރައްވާފައެއް ނުވެއެވެ.

އެކި ކުށްތަކާއި ގުޅިގެން ރާއްޖެއިން ޑީޕޯޓްކޮށްފައިވާ ބިދޭސީން ޝަޚުޞު އޮޅުވާަލައި ވަގު ޕާސްޕޯޓުތަކުގައި ރާއްޖެއަށް އެތެރެވުމަށް މަސައްކަތް ކުރަނިކޮށް މީގެ ކުރިންވެސް އަތުލައިގަނެވިފައިވެއެވެ.