ރާއްޖޭގައި އަމިއްލަ މަސައްކަތްކުރައްވާ ފަރާތްތައް ދަފްތަރު ކުރުމުގެ މަސައްކަތް ބިޒްނަސް ސެންޓަރ ކޯޕަރޭޝަނުން ފަށައިފިއެވެ.

އެކޯޕަރޭޝަނުން ހާމަކުރައްވާފައިވާ ގޮތުގައި، މިއީ ދިވެހިރާއްޖޭގައި ވިޔަފާރިކުރާ އެންމެކުދި، ކުދި އަދި މެދުފަންތީގެ ވިޔަފާރި މަރުކަޒީކޮށް ރަޖިސްޓަރީ ކުރުމުގެ ނިޒާމެއް ޤާއިމް ކުރުމުގެ ތެރެއިން، ދިވެހިރާއްޖޭގައި އަމިއްލަ މަސައްކަތްކުރައްވާ ފަރާތްތަކާއި، އެފަރާތްތައް މަސައްކަތް ކުރައްވާ ދާއިރާތައް ދެނެގަނެ އެފަރާތްތަކަށް ވިޔަފާރީގެ ފަހި މާހައުލެއް ކަށަވަރުކޮށް، އެފަދަ ވިޔަފާރިތައް ތަރައްޤީ ކުރުމަށް ބޭނުންވާ އެހީތެރިކަން ފޯރުކޮށްދިނުމުގެ މަޤުޞަދުގައި އެކުލަވާލެވޭ ދަފްތަރެކެވެ. މި ދަފްތަރުގައި އަމިއްލަ މަސައްކަތް ކުރައްވާ ފަރާތްތައް ދަފްތަރު ކުރުމުގައި ޢަމަލުކުރާނެ އުޞޫލެއްވެސް ވަނީ ކަނޑައަޅާފައި ކަމުގައި އެކުންފުނިން ހާމަކޮށްފައިވެއެވެ.

ބީސީސީން ހާމަކޮށްފައިވާ ގޮތުގައި، ދަފްތަރުގައި ރަޖިސްޓަރީވުމުގެ ފުރުޞަޠު 27 ސެޕްޓެމްބަރ 2024 ވާ ހުކުރު ދުވަހުން ފެށިގެން އެކަމަށް ޚާއްޞަ އޮންލައިން ޕޯޓަލެއް މެދުވެރިކޮށް ވަނީ މިހާރު ހުޅުވާލާފައެވެ. އަދި މި ޕޯޓަލްގެ ލިންކު ބީސީސީގެ މީސްމީޑިޔާ މަންސަތަކުންނާއި ބީސީސީގެ ވެބްސައިޓް www.bcc.mv އިން ހުކުރު ދުވަހުގެ މެންދުރުފަހު 14:00 ން ފެށިގެން ފެންނަން ހުންނާނެ ކަމުގައިވެސް އެކުންފުނިން ވަނީ ހާމަކޮށްފައެވެ.

ރާއްޖޭގެ އެކިކަންކޮޅުތަކުގައި ތިއްބެވި، ވިޔަފާރީގެ ގޮތުގައި އަމިއްލަ މަސައްކަތްކުރައްވާ ފަރާތްތައް މި ދަފްތަރުގައި ރަޖިސްޓަރީ ވުމަކީ އެފަރާތްތަށް ވިޔަފާރީގައި ކުރިއަށް ދިއުމަށް ބޭނުންވާ ވަރަށްގިނަ ކަންކަމުގައި ލުއިފަސޭހަތައް ލިބޭނެ ކަމެއްކަމުން، އެފަދަ ހުރިހާ ފަރާތްތަކެއްވެސް މި ފުރުޞަޠުގެ ބޭނުން ހިއްޕެވުމަށް ބީސީސީން ވަނީ އެދިފައެވެ.