އިންގްލިޝް ޕްރިމިއަރ ލީގުގައި އާދިއްތަ ދުވަހުގެ ރޭ މެންޗެސްޓަރ ސިޓީ އާއި އާސެނަލް ބައްދަލުކުރި މެޗުގައި، ޕެޕް ގާޑިއޯލާ އެންމެ އިތުބާރުކުރާ އެއް ކުޅުންތެރިޔާ ކަމުގައިވާ ސްޕެއިންގެ މިޑްފީލްޑަރ، ރޮޑްރީގޯ ހެނާންޑޭޒް ކަސަންޓޭ (ރޮޑްރީ) އަށް ލިބުނު އަނިޔާއާ ގުޅިގެން އޭނާއަށް ދެން މި ސީޒަނުގައި އެއްވެސް މެޗެއް ނުކުޅެވޭނެކަމަށް، މި އަނިޔާއާ ގުޅިގެން ފުރަތަމަ ހެދި ޓެސްޓުތަކުގެ ނަތީޖާތައް ބުނެފިއެވެ.

ސިޓީ އޮފް މެންޗެސްޓަރ ސްޓޭޑިއަމްގައި ކުޅުނު މެޗުގައި 28 އަހަރުގެ ރޮޑްރީއަށް އަނިޔާވެ، އޭނާ ބަދަލުކޮށްފައިވަނީ މެޗުގެ 21 ވަނަ މިނެޓުގައެވެ. ރޮޑްރީއަށް އަނިޔާވި ހާދިސާގައި އާސެނަލްގެ ތޯމަސް ޕާޓޭގެ ފައިން ރޮޑްރީގެ ފައިގައި ޖެހުނީ މަޑުމަޑުން ނަމަވެސް، އޭނާއަށް ބޮޑަށް އަނިޔާވީ ފައި އެޅުނު ގޮތަކުންނެވެ.

ފުރަތަމަ ހެދި ޓެސްޓުތަކުގެ ނަތީޖާތައް ދައްކާ ގޮތުން، އަނިޔާ ލިބިފައިވަނީ ރޮޑްރީގެ އޭސީއެލް އަށެވެ. ނަމަވެސް އޭނާގެ ހާލަތާމެދު ގޮތެއް ނިންމާނީ އިތުރު ޓެސްޓުތަކެއް ހެދުމަށްފަހުކަމަށް މެންޗެސްޓަރ ސިޓީއިން ބުނެފައިވެއެވެ.

ރޮޑްރީއަށް އަނިޔާވިއިރު އޭނާގެ ބަދަލުގައި ކުޅޭނެ އެ ފެންވަރުގެ ކުޅުންތެރިއެއް ބެންޗުގައި ނެތުމަކީ ގާޑިއޯލާއަށް އޮތް ބޮޑު ގޮންޖެހުމެކެވެ. ރޮޑްރީގެ ޕޮޒިޝަނަށް، އިނގިރޭސި މިޑްފިލްޑަރ ކެލްވިން ފިލިޕްސް 2022 ގައި ގެނައި ނަމަވެސް، ގާޑިއޯލާ އެހާ ގަޔާނުވެ، އޭނާ ވަނީ މި ސީޒަނުގައި ލޯނު އެއްބަސްވުމެއްގެ ދަށުން، ޕްރިމިއަރ ލީގަށް ޕްރޮމޯޓުވި  އިޕްސްވިޗަށް ދޫކޮށްފައެވެ. އެހެންކަމުން، ދެން އެ ޕޮޒިޝަނުގައި ބޭނުންކުރެވޭނީ، ކޮވަސިޗާއި، ގުންޑޮގަން ނޫނީ ރިކޯ ލެވިސްއެވެ.

ރޮޑްރީއާއި ނުލައި ސިޓީއަށް ނެރެވުނު ނަތީޖާތަކަށް ބަލާއިރު، އޭނާ ނެތްތަން ފޫބެއްދުމަށް އެ ޓީމުން ވަރަށް މަސައްކަތް ކުރަންޖެހޭނެއެވެ. މިދިޔަ ސީޒަން ފެށުނު އިރު އޭނާ ސަސްޕެންޝަނެއްގައި ހުރުމުން، ސީޒަންގެ ފުރަތަމަ 3 މެޗުގައި އޭނާއަށް ކުޅެވިފައި ނުވާއިރު، ސިޓީ ވަނީ އެ 3 މެޗުން ވެސް ބަލިވެފައެވެ. ރޮޑްރީ ޓީމުގައި ހުރެގެން މިދިޔަ ސީޒަނުގައި ސިޓީ ބަލިވެފައިވަނީ އެފްއޭ ކަޕް ފައިނަލުގައި މެންޗެސްޓަރ ޔުނައިޓެޑުގެ އަތުން އެކަންޏެވެ.

ރޮޑްރީއަކީ ނިމިދިޔަ ޔޫރޯގެ ޕްލޭޔަރ އޮފް ދަ ޓޯނަމެންޓެވެ. މީގެ އިތުރުން މި އަންނަ މަހު ހޮވާ ބެލަން ޑި އޯރ އެވޯޑަށް ވެސް އޭނާ ޝޯޓު ލިސްޓު ކޮށްފައި ވެއެވެ.