"ޓުވަރޑްސް އަ ކޮމަން ޑިޖިޓަލް ފިއުޗަރ"ގެ ކޯ-ޗެއަރގެ ޙައިސިއްޔަތުން، ރިޔާސަތު ބެލެހެއްޓުމުގެ ފުރުޞަތު ރާއްޖެއަށް ލިބުމުން، ރާއްޖޭގައި ޑިޖިޓަލް އިކޮނޮމީ ކުރިއަރުވައި، ޑިޖިޓަލައިޒޭޝަން ފުޅާކުރުމުގެ މަގު އިތުރަށް ފަހިވެގެން ހިނގައްޖެކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނުނ މިހެން ވިދާޅުވީ، ސަމިޓް އޮފް ދަ ފިއުޗަރގައި، "ޓުވަރޑްސް އަ ކޮމަން ޑިޖިޓަލް ފިއުޗަރ"ގެ ކޯ-ޗެއަރގެ ޙައިސިއްޔަތުން ބައިވެރިވެވަޑައިގެން ވާހަކަފުޅު ދެއްކެވުމަށްފަހުގައި އާއްމު ކުރެއްވި ބަޔާނުގައެވެ.

ރައީސުލްޖުމްހޫރިއްޔާ ވިދާޅުވީ، އދ. ގެ މެމްބަރު ޤައުމުތަކުގެ ތެރެއިން 190 އެއްހައި ޤައުމުތަކުން ބައިވެރިިވި އެ ބައްދަލުވުމުގެ ކޯޗެއާކަން ކުރަން ދިވެހިރާއްޖެއަށް ލިބުނު ކަމަކީ، ރާއްޖޭގައި ކުރިޔަށް ގެންދަން ބޭނުންވާ، ޑިޖިޓަލް އިކޮނޮމީ ކުރިޔަށް ގެންދިޔުމާއި ޑިޖިޓަލައިޒޭޝަން ފުޅާކުރުމުގެ ސިޔާސަތު ކުރިޔަށް ގެންދިޔުމުގައި، ލިބުނު ވަރަށް މުހިއްމު ފުރުޞަތެއް ކަމަށެވެ. އަދި މިއީ ރާއްޖޭގެނަން އިންޓަރނޭޝަނަލް ކޮމިއުނިޓީގައި ފާހަގަވެގެންދާން ލިބުނު ފުރުސަތެއް ކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ.

އެމަނިކުފާނު ވިދާޅުވީ، މިކަމުގެ ނަތީޖާ ރަނގަޅުވާނެ ކަމަށާއި އަދި އެއީ އެދާއިރާގެ ގުޅުންހުރި ފަރާތްތަކާއި ގުޅުންތައް ބަދަހިކުރުމަށް ލިބިގެން ދިޔަ ފުރުޞަތެއް ކަމަށެވެ.