އިންޑިއާ އާއި ދެކޮޅު ވަޢުދުފުޅު ތަކަކީ، ރިޔާސީ އިންތިޚާބު ކާމިޔާބު ކުރުމަށްޓަކައި، ވެވަޑައިގަންނަވަން ޖެހިވަޑައިގެންނެވި ވަޢުދުފުޅުތަކެއް ކަމުގައި ރައީސް ޑރ. މުޙައްމަދު މުޢިއްޒު ވިދާޅުވި ކަމުގައި، ސްރީލަންކާގެ ކުރީގެ ރައީސް ރަނިލް ވިކްރަމަސިންހަ ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، ސްރީލަންކާގެ ފަސްޓް ޕޯސްޓަށް ދެއްވި ބަސްދީގަތުމުގެ ތެރޭގައި ދެއްކެވި ވާހަކަފުޅުގައެވެ. 

އިންޑިއާ އާއި ދެކޮޅު ވަޢުދުތަކަކީ، އިންތިޚާބު ކާމިޔާބުކުރުމަށް ވެވަޑައިގަންނަވަން ޖެހުނު ވަޢުދުތަކެއްގެ ގޮތުގައި ރަނިލްގެ އަރިހުގައި، ރާއްޖޭގެ ރައީސް ޑރ. މުޙައްމަދު މުޢިއްޒު ވިދާޅުވިކަމަށް އެމަނިކުފާނު ވިދާޅުވި ނަމަވެސް އެހެން ވިދާޅުވީ ކޮން ބައްދަލުވުމެއްގައި ކަން ހާމަކުރައްވާފައެއް ނުވެއެވެ. ރައީސް ޑރ. މުޙައްމަދު މުޢިއްޒު އާއި، ސްރީލަންކާގެ ކުރީގެ ރައީސް ރަނިލްވިކްރަމަ ސިންހަ ދެ ފަހަރެއްގެ މަތިން ބައްދަލުުކުރައްވާފައިވެއެވެ. އެއީ ރައީސް ޑރ. މުޙައްމަދު މުޢިއްޒު ވެރިކަމުގެ ހުވާކުރެއްވި ދުވަސް ކަމުގައިވާ 17 ނޮވެމްބަރު 2023 ގަޔާއި، 9 ޖޫން 2024 ގައި އިންޑިއާގެ ދިއްލީއަށް ކުރެއްވި ދަތުރުފުޅުގައެވެ. މިގޮތުން އިންޑިއާގެ ބޮޑުވަޒީރު ނަރެންދުރަ މޯދީއާ އެމަނިކުފާނުގެ ސަރުކާރު ހުވާކުރެއްވުމުގެ ދަރުބާރު އޮތް އެ ދުވަހުވެސް ރަނިލްއާ ޑރ. މުޢިއްޒު ބައްދަލުވެވަޑައިގެންނެވިއެވެ.

ރަނިލްގެ އިންޓަރވިއުގައި ފާހަގަކުރެއްވި ގޮތުގައި، އިންޑިއާ އާއެކު ރައީސް ޑރ. މުޙައްމަދު މުޢިއްޒުގެ ސަރުކާރުން އަންނަނީ ގުޅުން ބަދަހިކުރަމުންނެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަރަށް އަވަހަށް އިންޑިއާއަށް ރަސްމީ ދަތުރުފުޅެއް ކުރައްވާނެ ކަމުގައިވެސް ސަރުކާރުން ވަނީ ހާމަކުރައްވާފައެވެ.