ޤަވާއިދުން ނަގަންޖެހޭ ހުއްދަތައް ނުނަގައި ހިންގަމުން އަންނަ، ހިޖާމާ ކްލިނިކެއް ބަންދުކުރުވައި، ޤަވާއިދުގެ ތެރެއިން ހުއްދަ ނަގައިގެން އެކަން ކުރުމަށް އެކްލިނިކްގެ ވެރިފަރާތަށް އަންގާފައިވާކަމުގައި، ފުލުހުންގެ އިދާރާއިން ހާމަކޮށްފިއެވެ.

ފުލުހުންގެ އިދާރާއިން ވިދާޅުވީ، ޤަވާއިދުން ނަގަންޖެހޭ ހުއްދަތައް ނުނަގައި ޚިދުމަތް ދެމުން އަންނަ ހިޖާމާ ކްލިނިކެއްގެ މައްސަލަ ބަލައި ދިނުމަށް ހެލްތު މިނިސްޓްރީގެ ފަރާތުން ފުލުހުންނަށް ހުށައަޅާފައިވާ ކަމަށެވެ. އަދި އެމައްސަލައިގައި ފުލުހުން ބަަލަންޖެހޭ ކަންކަން ވަނީ ބަލާފައި ކަމަށާއި، އަލި ކްލިނިކްގެ ވެރިފަރާތުން ޤާނޫނުގެ ދަށުން ހޯދަންޖެހޭ ހުއްދަތައް ހޯދައިގެން ހިޖާމާގެ ފަރުވާ ދިނުމަށާއި، މިހާރު ދެމުންގެންދާ ހިޖާމާޖެހުމުގެ ޚިދުމަތް ހުއްދަ ލިބެންދެން ހުއްޓާލުމަށް ލިޔުމުން އަންގައި ނަސޭޙަތްތެރިވެވިފައިވާ ކަމުގައި ފުލުހުންގެ އިދާރާއިން ވިދާޅުވިއެވެ. ފުލުހުންގެ އިދާރާއިން ވިދާޅުވީ، މިމައްސަލައިގައި ފުލުހުން ހިންގާ ތަޙްޤީޤަށް ކްލިނިކް ހިންގާ ފަރާތުން ފުރިހަމައަށް އެއްބާރުލުން ދެމުން އަންނަ ކަމަށެވެ.

2016 ވަނަ އަހަރުން ފެށިގެން ފަޒީލާ އުސްމާނު (ފަޒީ) ކުރަމުން އަންނަ ހިޖާމާ ޖެހުމުގެ މަސައްކަތް އެކި ސަރުކާރުތަކުގައި ވަނީ ހުއްޓުވާފައެވެ. 2019 ވަނަ އަހަރު ކްލިނިކެއް ހުޅުވައިގެން އޭނާ ޚިދުމަތްދޭން ފެށީވެސް ނަގަންޖެހޭ ހުއްދަތައް ނުނަގައި، އަދި ރަޖިސްޓްރީވެސް ނުކޮށެވެ.