ވައިގެ މަގުން ރާއްޖެއަށް މަސްތުވާތަކެތި އެތެރެކުރަން މަސައްކަތް ކުރި ތިން މީހަކަށް ދައުވާކޮށްދިނުމަށް އެދި ފުލުހުންގެ އިދާރާއިން ޕްރޮސެކިއުޓަރ ޖެނެރަލްގެ އޮފީހަށް މައްސަލަ ފޮނުވައިފިއެވެ.

ފުލުހުންގެ އިދާރާއިން ހާމަކުރައްވާފައިވާ ގޮތުގައި، ދައުވާކޮށްދިނުމަށް އެދިފައި ވަނީ، ޕާކިސްތާނު މީހަކާއި، ދެ ދިވެހިންގެ މައްޗަށެވެ. އެތިން މީހުންނަކީ، ޕާކިސްތާނުގެ ރައްޔިތެއް ކަމުގައިވާ، މޮލްވި މުޙައްމަދު ހާރޫން (49އ) އާއި، ވ. ސިނަމާލެ 4 3-03 ޝާހިލް މުޙައްމަދު (40އ) އަދި ހދ. ކުމުންދޫ / ނަރުގިސްވިލާ، އަޙްމަދު ޢައްފާނު (25އ) ކަމުގައި ފުލުހުންގެ އިދާރާއިން ވިދާޅުވެފައިވެއެވެ. ފުލުހުންގެ އިދާރާއިން ވިދާޅުވީ އެމީހުންގެ މައްޗަށް ކުރެވުނު ތުހުމަތާއި ގުޅޭ ތަޙްޤީޤުތައް ނިންމައި އެމީހުންގެ މައްސަލަ ޕީޖީ އޮފީހަށް ފޮނުވާފައި ވަނީ މިމަހުގެ 17 ވަނަ ދުވަހުގައި ކަމަށެވެ. 

އެތިން މީހުން ހައްޔަރުކޮށްފައި ވަނީ، މިއަހަރުގެ ޖުލައި މަހުގެ 24 ވަނަ ދުވަހުގެ ފަތިހު 5:10 ހާއިރު ވެލާނާ އިންޓަނޭޝަނަލް އެއާޕޯޓުގައި ޖެއްސި ފްލައިޓަކުން ރާއްޖެއަށް އައިތަނުން، އެމީހުންގެ އަތުން މަސްތުވާތަކެތި ފެނުމުންނެވެ.