ވައިގެމަގުން ރާއްޖެއަށް މަސްތުވާ ތަކެތި އެތެރެކުރަން އުޅުނު ކަމުގެ ތުހުމަތުގައި އުމުރުން 65 އަހަރުގެ މީހަކު ހައްޔަރުކޮށް އެމީހާގެ ބަންދަށް 15 ދުވަސް ޖަހައިފިއެވެ.

ފުލުހުންގެ އިދާރާއިން ވިދާޅުވެފައިވާ ގޮތުގައި އެމައްސަލައިގައި ހައްޔަރުކޮށްފައި ވަނީ، ސ. ހިތަދޫ، ވެހެތާނުގެ، ޢަބްދުﷲ ޞާދިޤު (65އ)އެވެ. އޭނާ ހައްޔަރުކޮށްފައި ވަނީ މިދިޔަ އަންގާރަ ދުވަހު އޭނާ ރާއްޖެ އައިތަނުން، އެއާޕޯޓުންނެވެ. އަންގާރަ ދުވަހު ކަސްޓަމްސް އިން އޭނާ ފުލުހުންނާއި ހަވާލު ކުރީ، އޭނާގެ ލަގެޖުން، 349 ގްރާމް ހެރޮއިން ފެނުމާއި ގުޅިގެންނެވެ.

ފުލުހުންގެ އިދާރާއިން ވިދާޅުވީ އެމައްސަލަ ތަޙްޤީޤުކުރަމުން ގެންދާ ކަމަށެވެ.