އެންމެ ހެޔޮ ޢަމަލުގެ ތެރެއިން ފުރަތަމަ ކަމަކީ މުސްލިމުންގެ ހިތަށް އުފާވެރިކަން ވައްދައި ދިނުން ކަމުގައި މިއަދު ޙުކުރު ޚުޠުބާގައި ބުނެފިއެވެ.

"އެންމެ މަންފާހުރި މީހާ" މި މައުލޫއަށް މިއަދު މުޅި ރާއްޖޭގެ މިސްކިތްތަކުގައި އިއްވި ހުކުރު ޚުޠުބާގައި ބުނެފައި ވަނީ، ރަޞޫލާގެ ޙަދީޘްފުޅުން ހާމަވާ ގޮތުގައި ހެޔޮ އަމަލުގެ ތެރެއިން އެންމެ ފުރަތަމަ ކަމަކަށް މާތް ނަބިއްޔާ ބަޔާންކޮށްދެއްވާފައި ވަނީ، މުސްލިމުންގެ ހިތަށް އުފާވެރިކަން ވައްދައިދިނުން ކަމަށެވެ. އެގޮތުން އެންމެ އިސްކަން ދޭންޖެހޭނީ ތިމާގެ މައިންބަފައިންނާއި އަނބިދަރީންނާއި ގާތްތިމާގެ މީހުންނާއި އަވައްޓެރީންނަށްކަންވެސް ނަބިއްޔާގެ ޙަދީޘުން އެނގޭ ކަމުގައި ޚުޠުބާގައި ބުނެފައިވެއެވެ. މިގޮތުން އެމީހުންގެ ހިތްތައް ބާއްޖަވެރިކޮށް ހިނިތުންވުން ގެނެސްދިނުމަށް މަސައްކަތް ކުރުމަށާއި، އެމީހުންނަށް ނުރުހުންތެރިކަން ފާޅުނުކުރުން ޚުޠުބާގައި ފާހަގަކޮށްފައި ވެއެވެ.

މީގެ އިތުރުން ޚުޠުބާގައި ބުނެފައި ވަނީ، ދެވަނައަށް އެންމެ ހެޔޮ ޢަމަލަކީ މުސްލިމެއްގެ ކިބައިން މުޞީބާތެއް ދުރުކޮށްދިނުން ކަަމަށެވެ.  އަދި ދުނިޔެއާ އާޚިރަތުގައި ކުރިމަތިވެދާނޭ މުޞީބާތަކުން ނަޖާކޮށްދެއްވުން އެދޭނަމަ، މީސްތަކުންނާއި ކުރިމަތިވާ މުޞީބާތްތަކުން އެމީހުން ނަޖާކޮށްދިނުމަށް މަސައްކަތްކުރުމަށްވެސް ހުކުރު ޚުޠުބާގައި ވަނީ ގޮވާލާފައެވެ.

އަދި ދުނިޔޭގައި މުއުމިނަކު މުސީބާތަކުން ޞަލާމަތްކޮށްދީފި މީހާގެ ކިބައިން ޤިޔާމަތް ދުވަހުގެ މުޞީބާތެއް ލުއިކޮށްދެއްވާނެ ކަމަށާއި، އަތްމަތި ދަތި މީހަކަށް ލުއިކޮށްދިން މީހަކަށް، އާޚިރަތުގައި ﷲ ލުއި ފަސޭހަކޮށްދެއްވާނޭ ކަމުގައިވެސް ނަބިއްޔާގެ ޙަދީޘުން ސާބިތުވާކަމަށްވެސް ޚުޠުބާގައި ވަނީ ބުނެފައެވެ. މީގެ އިތުރުން، މުސްލިމަކު ފަޟީހަތް ނުކޮށް އޭނާގެ ޢައިބުތައް ވަންހަނާކޮށްދިން މީހާ، ދުނިޔެއާ އާޚިރަތުގައިވެސް މާތްﷲ އެމީހަކު ފަޟީހަތް ނުކުރައްވާނެ ކަމުގައި ހުޠުބާގައި ވަނީ ބުނެފައެވެ.