ރާއްޖޭގެ ފުޓުބޯޅަ ސީޒަން ފެށޭނެ ވަކި ތާރީހެއް އަދި ބުނެދެވޭން ނެތްކަމަށް، ވަގުތީ ގޮތުން ފުޓުބޯޅަ އެސޯސިއޭޝަން އޮފް ދަ މޯލްޑިވްސް (އެފްއޭއެމް) ހިންގުމާއި ހަވާލުވެފައިވާ ނޯމަލައިޒިން ކޮމެޓީއިން ހާމަކޮށްފިއެވެ.

ނޯމަލައިޒިން ކޮމެޓީ އިން ބުދަ ދުވަހު ބޭއްވި ނޫސްވެރިންގެ ބައްދަލުވުމުގައި އެ ކޮމެޓީގެ ޗެއާ އަހުމަދު ޒުހޫރު ވިދާޅުވެފައިވަނީ، ކުލަބުތަކުގެ މާލީ ހާލަތު ދަށްވެފައިވުމާއި ސްޓެޓިއުޓްސްގައި ހުރި ބައެއް ކޮމިޓީތައް މިވަގުތު ހުސްވެފައިވުމުގެ ސަބަބުން، ސީޒަން ފެށުމަށް ގިނަ ދުވަސް ހޭދަވާނެ ކަމަށެވެ.

ކުލަބުތަކުގެ މާލީ ހާލަތު ރަގަޅު ކުރުމަށް އެހީތެރިވުމުގެ ގޮތުން ސަރުކާރުން ވަނީ 2017 ވަނަ އަހަރު، ސަރުކާރު ހިއްސާވާ ކުންފުނިތައް މެދުވެރިކޮށް ފުރަތަމަ ޑިވިޝަނުގެ ކޮންމެ ކްލަބަކަށް ކޮންމެ ސީޒަނަކަށް ތިން މިލިއަން ރުފިޔާ ދޭން ފަށާފައެވެ. ނަމަވެސް 2018 ވަނަ އަހަރު އެކަން ވަނީ ސަރުކާރުން ހުއްޓާލާފައެވެ.

އަދި ސަރުކާރުން ކުލަބްތަކަށް ފައިސާ ދިނުން ހުއްޓާލުމާ ގުޅިގެން ކޮންމެ ސީޒަނަކު ކްލަބްތަކަށް ހަމަ އެ އަދަދަށް ފައިސާ ދޭން އެފްއޭއެމް އިން ނިންމިއެވެ. ނަމަވެސް، އެފްއޭއެމްއިން ކްލަބުތަކަށް ބަރާބަރަށް މި ފައިސާ ނުދޭތީ އެ ޝަކުވާ ކްލަބުތަކުން ވަނީ އުފުލާފައެވެ.

އެފްއޭއެމްއިން ކްލަބުތައް ހިންގުމަށް ފައިސާ ދޫކުރި ނަމަވެސް، އެކަން ކުރަމުން ދިޔަ އުސޫލެއް އެންގެން ނެތްކަމަށް ޒުހޫރު ވަނީ ހާމަކުރައްވާފައެވެ. އަދި އެއީ އެފްއޭއެމްގެ މެންޑޭޓުގައި ވެސް ހިމެނޭ ކަމެއް ނޫންކަމަށް ޒުހޫރު ވިދާޅުވިއެވެ.

ނަމަވެސް، ކްލަބުތަކަށް އެފްއޭއެމްއިން ފައިސާ ދޫކުރަމުން އައީ އެއްވެސް ފަރާތެއްގެ އެހީތެރިކަމާއެކުކަން އެނގި، އަދި އެ ފަރާތުން ކްލަބުތަކަށް ފައިސާ ދޭނެ އެހީ އިތުރަށް ލިބިއްޖެނަމަ، އެ ފައިސާ ނުހިފަހައްޓާ ކްލަބްތަކަށް ދޫކުރާނެ ކަމަށް ވެސް ޒުހޫރު ވިދާޅުވިއެވެ.

މީގެ ހަތް މަސް ކުރިން ރާއްޖޭގެ ދެ ވަނަ ޑިވިޝަން ފުޓްބޯޅަ މުބާރާތަށް ފަހު، ރަސްމީ ސީނިއާ ފުޓްބޯޅައިގެ އެއްވެސް މުބާރާތެއް ނުބާއްވައެވެ. އެހެންކަމުން ރާއްޖޭގައި ފުރަތަމަ ޑިވިޝަން ފުޓްބޯޅަ ނުކުޅޭތާ ނުވަ މަސް ދުވަސް މި ވަނީ ފާއިތުވެފައެވެ.