އިމިގްރޭޝަންގެ އޮފިސަރެއް ކަމަށް ހެދިގެން ބިދޭސީންގެ އަތުން ފޭރުނު  މައްސަލައިގައި ހައްޔަރުކޮށްފައިވާ މީހާގެ ބަންދަށް 10 ދުވަސް ޖަހައިފިއެވެ.

ފުލުހުންގެ އިދާރާއިން ވިދާޅުވީ އެމައްސަލައިގައި ހައްޔަރުކޮށްފައިވާ، ގ. ބެރުގެ އުމުރުން 44 އަހަރުގެ މުޙައްމަދު ނަވީންގެ ބަންދާއި މެދު ގޮތެއް ނިންމުމަށް ކުރިމިނަލް ކޯޓަށް ހާޟިރުކޮށް ބަންދުގެ މުއްދަތު ޖަހާފައި ވަނީ އިއްޔެ ކަމަށެވެ. އިމިގްރޭޝަންގެ އޮފިސަރެއް ކަމަށް ބުނެ ބިދޭސީން ދިރިއުޅޭ ގެއަކަށް ވަދެ، ބިދޭސީ އެއްގެ އަތުން 9000ރ ފޭރިގަތް މައްސަލައިގައި އޭނާ ހައްޔަރުކޮށްފައި ވަނީ ހޯމަ ދުވަހުގައެވެ. އޭނާ އާއެކު އެ ފޭރުމުގައި އިތުރު މީހަކުވެސް ބައިވެރިވި ކަމަށް ސޯޝަލްމީޑިއާގައި އަޑު ފެތުރުނު ނަމަވެސް އެމައްސަލައިގައި ހައްޔަރުކުރި ކަމަށް ފުލުހުން ހާމަކޮށްފައި ވަނީ ނަވީން އެކަންޏެވެ.

ރާއްޖޭގައި ޤަވާއިދާއި ޚިލާފަށް އުޅޭ ބިދޭސީންގެ މައްސަލަ ހައްލު ކުރުމަށް އިމިގްރޭޝަނުން ކުރަމުންދާ މަސައްކަތްތަކުގެ ތެެރެއިން ބިދޭސީން ވިޔަފާރިތައް ހިންގަމުން ގެންދާ ތަންތަނާއި އެމީހުން ދިރިއުޅޭ ތަންތަން ބަލައި، ޤަވާއިދާއި ޚިލާފަށް އުޅޭ ބިދޭސީން އިމިގްރޭޝަންގެ ބެލުމުގެ ދަށަށް ގެނައުމުގެ އޮޕަރޭޝަންތައް އިމިގްރޭޝަނުން ދަނީ ހިންގަމުންނެވެ.