މީހަކު ރަހީނުކޮށް އޭނާގެ އިނގިލި ބުރިކޮށްލައި، އަދި އޭނާލައްވައި މަސްތުވާތެކެތި ވިއްކުވި މައްސަލައިގައި ހައްޔަރުކޮށްފައިވާ ގުރޫޕުގައި ސިފައިންގެ ދެމީހަކުވެސް ހިމެނޭ ކަމުގައި ފުލުހުންގެ އިދާރާއިން ވިދާޅުވެއްޖެއެވެ.

ފުލުހުންގެ އިދާރާއިން މިއަދު ބޭއްވި ނޫސްވެރިންގެ ބައްދަލުވުމުގައި، ޗީފް ސުޕްރިޓެންޑެންޓް އޮފް ޕޮލިސް ހަސަން ޝިފާއު ވިދާޅުވީ، އެމައްސަލައިގައި ހައްޔަރުކޮށްފައިވާ ސިފައިންގެ ދެމީހުންނާއި ގުޅޭ މައުލޫމާތު އެމްއެންޑީއެފާއި ޙިއްޞާކޮށްފައި ވާނޭ ކަމަށެވެ. އަދި އެމީހުންނާއި މެދު އެއިދާރާއިން އަޅަންޖެހޭ ފިޔަވަޅުތައް އަޅަމުންގެންދާނީ އެ އިދާރާއިންކަންވެސް ޝިފާން ފާހަގަކުރެއްވިއެވެ.

މިއަދު ބޭއްވި ނޫސްވެރިންގެ ބައްދަލުވުމުގައި ވަނީ މިމައްސަލައިގައި ހައްޔަރު ކުރި 5 މީހުންގެ ވަނަވަރުވެސް ހާމަކޮށްފައެވެ. މިމައްސަލައިގައި ހައްޔަރުކޮށްފައި ވަނީ، ރ. ކަނދޮޅުދޫ، މެހުރާ، އަލީ ސާމީ، (25އ)، އާއި ގދ. ގައްދޫ، ހުދުވެލި، އަހުމަދު ސާއިފް ވަހީދު، (18އ)، އާއި ތ. ތިމަރަފުށި، އުތުރުގެއާގެ، މުހައްމަދު ނަހުޝާން ހުސެއިން، (21އ)، އާއި، ކ. މާފުށި، ފުލްމޫން، މުހައްމަދު ނަފާޙް، (23އ)، އަދި ލ. ގަން، ތުނޑި ލިންކް، އަހުމަދު ޒަޔާން، (24އ) އެވެ. މި މީހުންގެ ތެރެއިން ނަފާޙް އާއި ޒަޔާންއަކީ، އެމްއެންޑީއެފްގެ އޮފިސަރުންނެވެ.

ޝިފާއު ވިދާޅުވީ، އެމީހުން، ރަހީނުކޮށްގެން ގެންގުޅެފައި ވަނީ 30 އަހަރުގެ ދިވެހި ފިރިހެނެއް ކަމަށާއި އެ މީހާއަށް ޖިސްމާނީ ބޮޑެތި އަނިޔާތަކެއް ދީފައިވާ ކަމަށެވެ. މިގޮތުން އެމީހާގެ ވާތުފައިގެ ކުޑަވައި އިނގިލީގެ ދެވަނަ ބަދަ އާއި ހިސާބުން އިނގިލި ބުރިކޮށްލުމުގެ އިތުރުން، އޭނާގެ ގައިގައި އަލިފާން ޖެއްސުމާއި ތަޅައި އަނިޔާކުރުމުގެ ސަބަބުން ހަށިގަނޑުގެ ތަންތަން ނޫފައިގަނެ، އަދި ވައަތު ލޯވެސް ދުޅަވެފައި ހުރިކަމަށެވެ.

މީގެ އިތުރުން އެމީހާ ރަހީނުކޮށްގެން ގެންގުޅެފައިވާ ދެ އެޕާޓްމަންޓްގެ ތެރެއިން މަސްތުވާތަކެއްޗާއި މަސްތުވާތަކެތި ބަންދުކުރުމަށް ބޭނުންކުރާ ސާމާނު ފެނިފައިވާ ކަމަށްވެސް ޝިފާއު ވިދާޅުވިއެވެ.

މިމައްސަލައިގައި ހައްޔަރުކޮށްފައިވާ 5 މީހުންގެ އިތުރުން މިމައްސަަލައިގައި އުމުރުން 18 އަހަރު ނުފުރޭ ކުޑަ ތިންކުދިންވެސް ހިމެނޭކަން ޝިފާއު ވަނީ ފާހަގަކުރައްވާފައެވެ.