މާލެ އަތޮޅުގެ ފަސްގަނޑަކަށް ދަތުރުގޮސް އުޅެނިކޮށް ގެއްލުނުކަމަށް، ރިޕޯޓްކޮށްފައިވާ ތަސްލީމް ރާއްޖެއިން ބޭރަށް ފުރައިގެން ދިޔަކަން މިހާތަނަށް އެނގިފައި ނުވާކަމުގައި ފުލުހުންގެ އިދާރާއިން ވިދާޅުވެއްޖެއެވެ.

ފުލުހުންގެ އިދާރާއިން ބޭއްވި ނޫސްވެރިންގެ ބައްދަލުވުމުގައި، އެމައްސަލަ އާއި ގުޅޭ ގޮތުން މައުލޫމާތު ދެމުން ފުލުހުން ވިދާޅުވީ، މ. އަސަރީހަނދާން، ތަސްލީމް މުޙައްމަދު (43އ) ގެއްލުނު މައްސަލަ ޖިނާޢީ މައްސަލައެއްގެ ގޮތުގައި ތަޙްޤީޤުކުރަމުންދާ ކަމަށާއި، އޭނާ މައްސަލައިގައި އިންޓަރޕޯލްގެ ޔެލޯ ނޯޓިސް ނެރެފައި ވަނީ، އޭނާ ރާއްޖެއިން ބޭރަށް ފުރައިގެން ގޮސްފައިވާކަމަށް ބަލައިގެން ނޫންކަމަށެވެ. އަދި އޭނާ ގެއްލުނު މަސައްލަގައި ހުރިހާ ދިމާއަކަށް ބަލައިގެންވެސް ތަޙްޤީޤު ކުރިޔަށް ގެންދާ ކަމުގައި ފުލުހުން ވިދާޅުވިއެވެ.

ފުލުހުންގެ އިދާރާއިން ވިދާޅުވީ، ތަސްލީމް ހޯދުމަށް އޭނާ ގެއްލުނު ކަމަށް ބުނާ ފަސްގަނޑު ހިމެނޭ ސަރަހައްދުވެސް ޑައިވްކޮށްގެން ބަަލަމުން ގެންދާ ކަމަށެވެ. 

އޮގަސްޓް މަހުގެ 29 ވަނަ ދުވަހު، މާލެ އަތޮޅު ހުވަފެންފުށި ރިޒޯޓުކައިރީގައި ހިއްކާފައި އޮތް ފަސްގަނޑަކަށް ދަތުރުގޮސް އުޅެނިކޮށް ގެއްލުނުކަމަށް ބުނާ ތަސްލީމަށް ވީގޮތެއް މިހާތަނަށް ފުލުހުންނަށްވެސް އަދި ހޯދިފައެއް ނުވެއެވެ.