ޖަޕާން ސަރުކާރުން ލައިދީފައިވާ މާލޭގެ ބޭރުތޮށި މަރާމާތު ކުރުމަށް 2.5 މިލިޔަން ރުފޔާގެ ފައިސާގެ އެހީއެއް ދިނުމަށް ޖަޕާނު ސަރުކާރުން ނިންމައި ލެޓަރ އޮފް އެކްސްޗޭންޖުގައި މިއަދު ސޮއިކޮށްފިއެވެ.

ފޮރިން މިނިސްޓްރީން ހާމަކުރައްވާފައިވާ ގޮތުގައި، އެ އެހީދިނުމުގެ ގޮތުން ލެޓަރ އޮފް އެކްސްޗޭންޖުގައި ސޮއި ކުރުމުގެ ރަސްމިއްޔާތު ބާއްވާފައި ވަނީ ދިވެހިރާއްޖޭގެ ފޮރިން މިނިސްޓްރީގައެެވެ. 

ލެޓަރ އޮފް އެކްސްޗޭންޖުގައި ދިވެހި ސަރުކާރުގެ ފަރާތުން ސޮއިކުރެއްވީ ފޮރިން މިނިސްޓަރު މޫސާ ޒަމީރެވެ. ޖަޕާނު ސަރުކާރުގެ ފަރާތުން ސޮއިކުރެއްވީ އެ ގައުމުން ރާއްޖެއަށް ކަނޑައަޅާފައި ހުންނަވާ ސަފީރު ތަކެއުޗީ މިދޮރީ އެވެ.

ޖަޕާނުން ރާއްޖެއަށް ދިނުމަށް ނިންމާފައި ވަނީ 140،000$ ކަމުގައިވެސް ފޮރިން މިނިސްޓްރީން ވަނީ ހާމަކޮށްފައެވެ.

މާލޭގެ ވަށައިގެ ތޮށިލުމުގެ މަޝްރޫޢަކީ، 1990ގެ ކުރީ ކޮޅު ޖަޕާނު ސަރުކާރުގެ އެހީގައި ހިންގާފައިވާ މަޝްރޫޢެކެވެ.