މޯލްޑިވްސް އިމިގްރޭޝަންގެ އޮފިސަރުންކަމަށް ހެދިގެން، ގުރޫޕަކުން ބިދޭސީން ދިރިއުޅޭ ތަންތަނަށް ވަދެ ފޭރުުގެ ޢަމަލުތައް ހިންގަމުންދާތީ އެކަމަށް ސަމާލުވުމަށް މޯލްޑިވްސް އިމިގްރޭޝަނުން އިލްތިމާސްކޮށްފިއެވެ.

މޯލްޑިވްސް އިމިގްރޭޝަނުން ނެރެފައިވާ ބަޔާނެއްގައި ބުނެފައި ވަނީ، އިމިގްރޭޝަންގެ އޮފިސަރުންކަމަށް ބުނެ ބަޔަކު އޮޅުވާލައިގެން ބިދޭސީން އުޅެމުންދާ ތަންތަން ބަލައި ފާސްކުރަމުންދާ ކަމުގެ މައުލޫމާތު އެއިދާރާއަށް ލިބިފައިވާ ކަމުގައެވެ. އިމިގްރޭޝަނުން ވިދާޅުވީ، ސޯޝަލްމީޑިއާގައި ފޮޓޯ ދައުރުވަމުން އަންނަ، އިމިގްރޭޝަންގެ މީހުންކަމަށް ބުނެ ފޭރެމުންދާ މީހުންނަކީ، އިމިގްރޭޝަންގެ މުވައްޒަފުން ނޫންކަަމަށެވެ. އަދި އިމިގްރޭޝަންގެ މުވައްޒަފުން ބަލާފާސްކުރުމުގައި ހަރަކާތްތެރިވަމުން ގެންދާނީ، ޔުނީފޯމުގައި ކަމަށާއި އަދި އެމުވައްޒަފުންގެ އަތުގައި ފާސްވެސް އޮންނާނެ ކަމުގައި، އިމިގްރޭޝަނުން ވަނީ ވިދާޅުވެފައެެވެ.

އިމިގްރޭޝަނުން އެފަދަ ކަންކަމަށް ސަމާލުވުމަށް އިލްތިމާސްކޮށް، ޝައްކުވާނަމަ އެފަދަ މީހުންނާއި ސުވާލުކޮށް އެމީހުންގެ ފާހާއި ފުރިހަމަ މައުލޫމާތު އޮޅުން ފިލުވުމަށް އެދިފައެވެ.