Advertisement
ބިދޭސީއެއްގެ އަތުން ފޭރުނު މައްސަލައިގައި ހައްޔަރު ކުރި މީހާ ---
އިމިގްރޭޝަން އޮފިސަރުންކަމަށް ހެދިގެން ބިދޭސީއެއްގެ އަތުން ފޭރުނު މައްސަލައެއް
އިމިގްރޭޝަންގެ އޮފިސަރެއް ކަމަށް ހެދިގެން ބިދޭސީންގެ އަތުން ފޭރުނު މީހަކު ހައްޔަރުކޮށްފިއެވެ.
ފުލުހުންގެ އިދާރާއިން ވިދާޅުވީ، އިމިގްރޭޝަންގެ އޮފިސަރުންކަމުގައި ބުނެ ބިދޭސީން ދިރިއުޅޭ ތަނަކަށް ވަދެ ތިން މީހަކުވެގެން ބިދޭސީ މީހެއްގެ އަތުން 9000ރ ފޭރުނު މައްސަލައެއް ފުލުހުންނަށް އިއްޔެ ހުށައަޅާފައިވާ ކަމަށެވެ. އަދުި އެމައްސަލަ އާއި ގުޅިގެން ކޯޓު އަމުރެއްގެ ދަށުން ދިވެހި ފިރިހެނަކު ހައްޔަރުކޮށްފައިވާ ކަމުގައިވެސް ފުލުހުންގެ އިދާރާއިން ވިދާޅުވިއެވެ.
އެމައްސަލައިގައި އިއްޔެ ހައްޔަރުކޮށްފައި ވަނީ، ގ. ބެރުގެ އުމުރުން 44 އަހަރުގެ މުޙައްމަދު ނަވީން ކަމުގައި ފުލުހުންގެ އިދާރާއިން ވިދާޅުވިއެވެ. ފުލުހުންގެ އިދާރާއިން ވިދާޅުވީ، އެ މައްސަލަ ސީރިއަސް މައްސަލައެއްގެ ގޮތުގައި ފުލުހުން ބަލަމުން ގެންދާ ކަމަށެވެ.
ރާއްޖޭގައި ޤަވާއިދާއި ޚިލާފަށް އުޅޭ ބިދޭސީންގެ މައްސަލަ ހައްލު ކުރުމަށް އިމިގްރޭޝަނުން ކުރަމުންދާ މަސައްކަތްތަކުގެ ތެެރެއިން ބިދޭސީން ވިޔަފާރިތައް ހިންގަމުން ގެންދާ ތަންތަނާއި އެމީހުން ދިރިއުޅޭ ތަންތަން ބަލައި، ޤަވާއިދާއި ޚިލާފަށް އުޅޭ ބިދޭސީން އިމިގްރޭޝަންގެ ބެލުމުގެ ދަށަށް ގެނައުމުގެ އޮޕަރޭޝަންތައް އިމިގްރޭޝަނުން ދަނީ ހިންގަމުންނެވެ.
