މާލޭގެ ގެސްޓް ހައުސަކަށް ދިވެހި ފިރިހެނަކު ވައްދައި އޭނާއަށް ބިރު ދައްކައި ފޭރުނު މައްސަލައިގައި، ހައްޔަރު ކުރި އަންހެނަކާއި ފިރިހެނަކަށް ދައުވާކުރުމަށް ފުލުހުން ޕީޖީ އޮފީހަށް މައްސަލަ ފޮނުވައިފިއެވެ.

ފުލުހުންގެ އިދާރާއިން ވިދާޅުވީ، ފޭރުމުގެ އެ ޢަމަލު ހިންގި ގ. އޯލްޕެރިސް، އަޙްމަދު މިހާދު (44އ) އަދި ގ. ރަނައުރާގެއާގެ، ރިމާނާ މޫސާ (39އ) މައްޗަށް ދައުވާކުރުމާ މެދު ގޮތެއް ނިންމައިދިނުމަށް އެދި ޕްރޮސެކިއުޓަރ ޖެނެރަލްގެ އޮފީހަށް ފޮނުވާފައި ވަނީ މި ސެޕްޓެންބަރު މަހުގެ 12 ވަނަ ދުވަހުގައި ކަމަށެވެ. 

އެމީހުން ފޭރުމުގެ ޢަމަލު ހިންގާފައި ވަނީ، 2024 ޖުލައި 19 ވަނަ ދުވަހު މާލެ، ޔެލޯ ލައިޓް ސްޓޭ ގެސްޓު ހައުސްގެ ތެރޭގައެވެ. އެގެސްޓް ހައުސްއަށް އެމީހުން ވަނީ އޮޅުވާލައިގެން ދިވެހި ފިރިހެނަކު ގެންގޮސް އެމީހާއަށް ތޫނު އެއްޗަކުން ބިރު ދައްކައި އޮރިޔާންކޮށް، އެމީހާގެ ވޮލެޓާއި އެކައުންޓްގައި ހުރި ފައިސާތައް ފޭރިގެންފައެވެ.