ރީިޑިން ނުނަގައި ކަސްޓަމަރުންނަށް ބިލް ފޮނުވާކަމަށް ފަތުރާ ވާހަކަތައްކަކީ އެއްވެސް ޙަޤީޤަތެއް ނެތް ވާހަކަތަކެއް ކަމުގައި ސްޓެލްކޯއިން ހާމަކުރައްވައިފިއެވެ.

އެކަމާއި ގުޅިގެން އެކުންފުނިން އާއްމުކުރި ބަޔާނުގައި ވިދާޅުވީ، ކަރަންޓު އުފެއްދުމަށާއި ކަރަންޓު ފޯރުވައިދިނުމަށް 24 ގަޑިއިރު މެދު ނުކެނޑި ސްޓެލްކޯގެ މުވައްޒަފުން ކުރަމުންދާ މަސައްކަތާއި ކޮންމެ މަހަކު ކަސްޓަމަރުންގެ ގެތަކަށް ގޮސް މީޓަރުތަކުގެ ރީޑިންގ ނަގައި އިޚުލާސްތެރިކަމާއެކު ބިލްތައް ތައްޔާރުކޮށް އެ ބިލްތައް ފޮނުވުމާއި، ބިލަށް ފައިސާ ބަލައިގަނެ، ކަސްޓަމަރުން ބޭނުންވާ ޚިދުމަތްތައް ފޯރުވައިދޭން ކެނޑިނޭޅި ކުރަމުންދާ މަސައްކަތްތަކަކީ، ހެދިފައިވާ ހަރުދަނާ ޤަވާއިދުތަކާއި އުސޫލުތަކުގެ ތެރެއިން އެ މުވައްޒަފުން ކުރަމުންގެންދާ ވަރަށް ބުރަ އަދި ބޮޑު މަސައްކަތްތަކެއްކަމަށެވެ. އަދި އެ އުސޫލުތަކާއި ޚިލާފަށް މިކުންފުނިން އަމަލު ނުކުރާނެ ކަމުގެ ފުރިހަމަ ޔަޤީންކަމާއި އިތުބާރު ރައްޔިތުންނަށް އަރުވާ ކަމުގައިވެސް އެކުންފުނިން ވަނީ ވިދާޅުވެފައެވެ.

ސްޓެލްކޯއިން ވިދާޅުވީ، ސްޓެލްކޯގެ މަސައްކަތްތަކާއި މެދު ދޮގުވާހަކަތައް ފެތުރުމާއި އެކުންފުނީގެ ތަޞައްވަރުު ކިލަނބުކޮށް ރައްޔިތުންގެ ހިތްތަކުގައި އެކުންފުންޏާއި މެދު ނަފްރަތު އުފެއްދުމަށް ހިންގާ ޢަމަލުތައް ޙަރުކަށި ޢިބާރާތުން ކުއްވެރިކުރާ ކަމަށެވެ. މީގެ އިތުރުން ރައްޔިތުން މިކުންފުންޏަށް ކުރަމުންދާ އިތުބާރާއި، ޔަޤީންކަން ދެމެހެއްޓުމަށްޓަކައި ކުންފުނީގެ ވެރިންނާއި މުވައްޒަފުން ކުރަމުންދާ އިޚުލާސްތެރި ޚިދުމަތުގައި ދެމިތިއްބަވާނެ ކަމުގެ ޔަޤީންކަންވެސް އެކުންފުނިން ވަނީ އަރުވާފައެވެ.

ސްޓްލްކޯއިން ވިދާޅުވީ، ސްޓެލްކޯގައި މަސައްކަތް ކުރާ މުވައްޒަފުންނަކީ ވެސް ކުންފުނީގެ ކަސްޓަމަރުންކަމުން އެމުވައްޒަފުންނަކީ ވެސް އެހެނިހެން ކަސްޓަމަރުންނާއި އެއް އުސޫލަކުން ރީޑިންގ ނަގައި އެ ރީޑިންގއަށް ބިލް ކުރެވޭ ބައެއްކަމަށާއި، އަދި ރީޑިންގ ނެގުމާއި ނުލައި އަދި ކަސްޓަމަރުން ބޭނުން ނުކުރާ ކަރަންޓަކަށް ބިލް ނުކުރާނެކަމުގެ ޔަޤީންކަންވެސް އަރުވާ ކަމަށެވެ.

ސްޓެލްކޯއިން މާލެ ސަރަޙައްދުގައި ކަރަންޓްގެ ޚިދުމަތް ދެމުން އަންނަތާ 75 އަހަރު ވަނީ ވެފައެވެ.