ދިވެހިރާއްޖޭގެ ވެރިރަށް މާލެއަކީ، ދިވެހިރާއްޖޭގެ އެއްވެސް އަތޮޅަކަށް ނިސްބަތްވާ ރަށެއް ނޫންކަމުގައި، މިނިސްޓަރ އޮފް ސިޓީސް، ލޯކަލް ގަވަރންމަންޓް އެންޑް ޕަބްލިކް ވާރކްސް, އާދަމް ޝަރީފް ޢުމަރު ވިދާޅުވެއްޖެއެވެ.

މިނިސްޓަރ އާދަމް ޝަރީފް މިހެން ވިދާޅުވީ، ބައެއް ފަރާތްތަކުން ލިޔުމާއި ކިޔުމުގައި، "ކ. މާލެ" ބޭނުން ކުރަމުން ގެންދާތީ އެކަމާއި ގުޅޭ ގޮތުން ކަންބޮޑުވުން ފާޅުކުރައްވައި އެކްސްގައި ކުރެއްވި ޕޯސްޓެއްގައެވެ.

މިނިސްޓަރ އާދަމް ޝަރީފް ވިދާޅުވީ، ޤާނޫނު އަސާސީގެ 14 ވަނަ މާއްދާގައި ބުނަނީ، ދިވެހިރާއްޖޭގެ ވެރިކަން ކުރާ ރަށަކީ މާލެ ކަމަށެވެ. އަދި އެކަން ޤާނޫނު އަސާސީގައި ބަޔާންކޮށްފައި އޮންނައިރު، ވެރިކަން ކުރާ ރަށަކީ، ކ. މާލެ ކަމަށް ބާޔަން ކޮށްފައި ނޯންނަ ކަމަށާއި، އަދި ސަރުކާރުގެ ގިނަ ރަސްމީ ލިޔުންތަކުގައި، ކ. މާލެ ލިޔެފައި ނޯންނަ ކަމުގައިވެސް މިނިސްޓަރ އާދަމް ޝަރީފް ވިދާޅުވިއެވެ. 

މިނިސްޓަރ އާދަމް ޝަރީފް ވިދާޅުވީ،  ކ. އަތޮޅުގައި އޮތް ނަމަވެސް މާލެއަކީ، ދިވެހިރާއްޖޭގެ ވެރިކަންކުރާ ރަށްކަމުގައި ވާތީވެ، މާލެ ލިޔާއިރު ކުރިޔަށް ކާފު އިތުރުކޮށް ކ. މާލެ ލިޔެ ނޫޅޭ ކަމަށެވެ.  އެހެންވެ، ކ. މާލެ ލިޔުމަކީ އަދި، ކިއުމަކީވެސް ޤާނޫނު އަސާސީގައި އޮންނަ ގޮތާއި ޚިލާފަށް ކުރާ ކަމެއް ކަމުގައިވެސް މިިނިސްޓަރ އާދަމް ޝަރީފް އުމަރު ވިދާޅުވިއެވެ.  އަދި މިހާރަކަށް އައިސް ކ. މާލެ ކިޔުމާއި ލިޔުން އަންނަނީ އިތުރުވަމުން ކަމަށާއި، އެއީ ކުޑަކަމެއް ނޫން ކަމަށާއި ރަނގަޅު ކުރަންޖެހޭ ކަމެއް ކަމުގައިވެސް މިނިސްޓަރ އާދަމް ޝަރީފް ޢުމަރު ވިދާޅުވެފައިވެއެވެ.

ޤާނޫނު އަސާސީގައި މާލެ ކަމުގައި ބަޔާންކޮށްފައި ވަނީ، ހުޅުމާލެ އާއި ވިލިމާލެވެސް އެއީ މާލޭގެ ބައެއްގެ ގޮތުގައި ހިމަނައިގެންނެވެ. 

މިނިސްޓަރ އާދަމް ޝަރީފް މިހެން ވިދާޅުވުމާއި ގުޅިގެން ވަރަށް ގިނަ ބަޔަކު ވަނީ މިނިސްޓަރ އާދަމް ޝަރީފަށް ރައްދުދީފައެވެ.